راجستھان کے وزیر اعلیٰ گہلوت نے ’ای-وہیکل پالیسی‘ کو دی منظوری

راجستھان کے وزیر اعلیٰ اشوک گہلوت نے منگل کو راجستھان الیکٹرک وہیکل پالیسی (آر ای وی پی) کو منظوری دے دی۔ ایسی گاڑیوں کی خرید کو آسان بنانے کے لیے مجوزہ یکمشت تعاون اور ایس جی ایس ٹی ریچارج کے لیے 40 کروڑ روپے کے اضافی بجٹ کو منظوری دی گئی ہے۔ افسران نے کہا کہ اس پالیسی کے نافذ ہونے سے ریاست میں ڈیزل و پٹرول سے چلنے والی گاڑیوں سے ہونے والی آلودگی میں کمی آئے گی۔ وزیر اعلیٰ نے سال 20-2019 کے بجٹ میں الیکٹرک وہیکل پالیسی لانے کا اعلان کیا تھا۔ انھوں نے کہا تھا کہ ریاستی حکومت سبھی طرح کے ای-وہیکل کو فروغ دینے کے لیے پرعزم ہے۔

حکومت نے بیٹری صلاحیت کے مطابق دو پہیہ گاڑیوں کے لیے فی وہیکل 5000 سے 10000 روپے اور سہ پہیہ گاڑیوں کو 10000 سے 20000 روپے کی چھوٹ دینے کا اعلان کیا۔ ریاست میں ای-وہیکل کو بھی موٹر وہیکل ٹیکس کے دائرے سے باہر رکھا گیا ہے۔ نئی پالیسی میں ای-وہیکل فروخت کرنے والوں کو 7 دنوں کے اندر سبھی طرح کے ریچارج کرانے کا التزام کیا گیا ہے۔