راج ٹھاکرے کا نشی کانت دوبےکو دو ٹوک جواب

ایم این ایس کے سربراہ راج ٹھاکرے نے بی جے پی رکن پارلیمنٹ نشی کانت دوبے کے ’پٹک پٹک کے مارنے والے‘بیان پر سخت ردعمل دیا ہے۔ انہوں نے تنبیہ کرتے ہوئے کہا کہ’’ ایک ایم پی ہے جو کہتا ہے کہ ’پٹک پٹک کے  مارے گا ، دوبے مارے گا ، تم ممبئی آؤ، ہم تمہیں ممبئی کے سمندر میں ڈبو کر ڈبوکر ماریں گے۔‘‘

ایم این ایس سربراہ نے پوچھا، "دوبے کو کیا ہوا؟ کوئی معاملہ ہوا؟ آپ بھی 56 انچ کا سینہ لے کر گھومو، آپ مہاراشٹر کے مالک ہیں، اگر یہاں کوئی مراٹھی کی توہین کرے گا تو اس کے گال اور ہمارے ہاتھ ضرورملیں گے۔"

راج ٹھاکرے نے مہایوتی حکومت کو گھیرتے ہوئے کہا کہ دیویندر فڑنویس کیسا اسکرپٹ رائٹر ہے جو پہلے جی آر جاری کرتا ہے اور بعد میں اسے واپس لے لیتا ہے، میں آپ سب سے درخواست کرتا ہوں کہ آپ جہاں بھی جائیں مراٹھی میں بات کریں، چاہے آپ ٹیکسی، بس یا ٹرین میں ہوں، زیادہ سے زیادہ مراٹھی میں بات کریں۔ دیگر ریاستوں میں عوام کی حکومت مضبوطی  کے ساتھ عوام کے ساتھ کھڑی ہیں، جانیں سے پہلے صرف ایک بات کہوں گا کہ ہوشیار رہئے ، ہوشیار رہئے۔‘‘

دراصل، جھارکھنڈ کے گوڈا سے بی جے پی کے رکن پارلیمنٹ نشی کانت دوبے نے کہا تھا کہ ممبئی میں ہندی بولنے والوں کو مارنے والوں میں اگر ہمت ہے تو وہ مہاراشٹر میں دیگر زبان بولنے والوں کو مار یں۔اس دوران انہوں نے لوگوں کو پٹک پٹک کر مارنے والا بیان دیا تھا۔ انہوں نے کہا تھا، ''مہاراشٹر سے باہر آنے کی ہمت دکھائیں، ہم ہندی کی مخالفت کرنے والوں کو پٹک پٹک کر ماریں گے۔'' ممبئی سے متصل میرا روڈ علاقے میں ایم این ایس کے کارکنوں نے مراٹھی نہ بولنے پر ایک دکاندار کی پٹائی کی تھی۔ بی جے پی کے رکن پارلیمنٹ نشی کانت دوبے نے اس پر ٹھاکرے برادران پر حملہ کیا تھا۔