کشمیر میں رک رک کر بارشوں کا سلسلہ جاری

سری نگر: محکمہ موسمیات کی پیش گوئی کے عین مطابق وادی کشمیر میں رک رک کر بارشوں کا سلسلہ جاری ہے۔ متعلقہ محکمے کے ایک ترجمان کے مطابق وادی میں اگلے چوبیس گھنٹوں کے دوران ہلکی سے درمیانی درجے کی بارشیں ہونے کا امکان ہے۔ انہوں نے کہا کہ وادی میں 6 مئی تک موسمی صورتحال جوں کی توں رہنے کی توقع ہے۔ ان کا کہنا تھا کہ بعد ازں موسم میں بتدریج بہتری متوقع ہے۔ ادھر بارشوں کے باوجود وادی میں شبانہ درجہ حرارت معمول سے زیادہ ریکارڈ درج کیا گیا ہے۔

گرمائی دارلحکومت سری نگر میں گزشتہ چوبیس گھنٹوں کے دوران 8.3 ملی میٹر بارش ریکارڈ ہوئی ہے، جبکہ کم سے کم درجہ حرارت 11.8 ڈگری سینٹی گریڈ ریکارڈ کیا گیا۔ وادی کے مشہور زمانہ سیاحتی مقام گلمرگ میں گزشتہ چوبیس گھنٹوں کے دوران 3.8 ملی میٹر بارش ریکارڈ ہوئی ہے، جبکہ کم سے کم درجہ حرارت 4.2 ڈگری سینٹی گریڈ ریکارڈ کیا گیا۔

وادی کے دوسرے مشہور سیاحتی مقام پہلگام میں گزشتہ چویس گھنٹوں کے دوران سب سے زیادہ 25.4 ملی میٹر بارش ریکارڈ ہوئی ہے، جبکہ کم سے کم درجہ حررات4.2 ڈگری سینٹی گریڈ ریکارڈ کیا گیا۔ سرحدی ضلع کپوارہ میں گزشتہ چوبیس گھنٹوں کے دوران5.0 ملی میٹر بارش ریکارڈ ہوئی ہے جبکہ کم سے کم درجہ حرارت10.5 ڈگری سینٹی گریڈ ریکارڈ کیا گیا۔ گیٹ وے آف کشمیر کے نام سے مشہور قصبہ قاضی گنڈ میں گزشتہ چوبیس گھنٹوں کے دوران14.2 ملی میٹر ریکارڈ ہوئی ہے جبکہ کم سے کم درجہ حرارت 9.6 ڈگری سینٹی گریڈ ریکارڈ کیا گیا۔

دریں اثنا وادی میں بدھ کو صبح سے ہی موسم نہ صرف ابر آلود رہا بلکہ رک رک کر بارشیں بھی ہوئیں۔ بارشوں سے وادی کی بیشتر سڑکوں پر ہوئے گڑھوں میں جمع پانی اور کناروں پر جمع کیچڑ سے لوگوں کو چلنا پھرنا از بس محال ہوگیا ہے۔ لوگوں کا کہنا ہے کہ موثر ڈرینیج سسٹم نہ ہونے کی وجہ سے بارش کا پانی ڈرین کے ذریعے بہنے کے بجائے سڑکوں پر ہی جمع ہوجاتا ہے۔