’غیر ملکی انحصار کی وجہ سے کسانوں کی کمر جھکتی جا رہی‘، راہل گاندھی نے مرکزی حکومت کو بنایا ہدف تنقید

کانگریس کے سابق صدر اور لوک سبھا میں اپوزیشن لیڈر راہل گاندھی نے ایک بار پھر کسانوں کے مسائل کو اٹھاتے ہوئے مرکز کی بی جے پی حکومت پر جم کر حملہ بولا ہے۔ انہوں نے سوشل میڈیا پلیٹ فارم ’فیس بک‘ پر لکھا کہ ’’ہندوستان ایک زرعی ملک ہے اور کسان ہماری معیشت کی ریڑھ کی ہڈی ہیں۔ لیکن آج یہ ریڑھ کی ہڈی غیر ملکی انحصار کی وجہ سے جھکتی جا رہی ہے۔ ہندوستان 80 فیصد اسپیشلٹی فرٹیلائزر چین سے درآمد کرتا ہے اور اب چین نے سپلائی روک دی ہے۔‘‘

راہل گاندھی نے اس فیس بک پوسٹ میں یہ بھی لکھا ہے کہ ’’یہ پہلی بار نہیں ہے- یوریا اور ڈی اے پی جیسی ضروری کھادوں کی قلت سے ملک بھر کے کسان پہلے سے ہی نبرد آزما ہیں اور اب اسپیشلٹی فرٹیلائزر کا ’چینی بحران‘ پیدا ہونے لگا ہے۔‘‘ راہل گاندھی نے آگے لکھا کہ ’’اُدھر وزیر اعظم نریندر مودی جی کھاد کے تھیلوں پر اپنی تصویریں چھپوا رہے ہیں، اِدھر کسان ’میڈ ان چائنا‘ پر منحصر ہوتے جا رہے ہیں۔‘‘

حزب اختلاف کے رہنما کے مطابق ’’(کھاد کی) یہ فراہمی کبھی بھی رک سکتی ہے، یہ جاننے کے باوجود حکومت نے کوئی تیاری نہیں کی۔ جب گھریلو پیداوار کو فروغ دینے کی ضرورت تھی تو انہوں نے کوئی پالیسی، کوئی منصوبہ نہیں بنایا۔‘‘ ساتھ ہی راہل گاندھی نے حکومت سے کچھ سوالات بھی پوچھے ہیں۔ انھوں نے پوچھا کہ کیا کسان اب اپنی زمین پر بھی دوسروں پر انحصار کرے گا؟ قیمتی وقت اور اچھی فصل کا نقصان برداشت کرتا، قرض اور مایوسی میں ڈوبتا کسان پوچھ رہا ہے ’کس کا ساتھ، کس کا وکاس‘۔