قبائلی طلبہ کے احتجاج پر راہل گاندھی کا فڑنویس حکومت کو چیلنج، کہا- ’مطالبات ماننے ہوں گے‘

نئی دہلی: لوک سبھا میں قائد حزب اختلاف اور کانگریس کے سینئر رہنما راہل گاندھی نے مہاراشٹر میں طلبہ کے احتجاج اور ان کے خلاف پولیس کارروائی کو لے کر ریاست کی فڑنویس حکومت کو نشانہ بنایا ہے۔ انہوں نے کہا کہ مہاراشٹر کے طلبہ حکومت کی تعلیمی پالیسی اور ناانصافی سے پریشان ہیں اور کانگریس طلبہ کے ساتھ مضبوطی سے کھڑی ہے۔

راہل گاندھی نے پیر کو ایکس پر ایک پوسٹ میں کہا کہ قبائلی طلبہ اپنی مختلف مانگوں کو لے کر ممبئی پہنچے تھے۔ ان میں کچھ طلبہ بس سے آئے، جبکہ کچھ ناسک سے پیدل چل کر ممبئی پہنچے۔ انہوں نے کہا کہ ان طلبہ کی مانگیں کوئی غیر معمولی مطالبات نہیں ہیں، بلکہ قبائلی آشرم اسکولوں اور ہاسٹلوں میں بنیادی سہولیات، اسکالرشپ اور دیگر ضروری سہولیات فراہم کرنا ہر بچے کا حق ہے۔

راہل گاندھی کے مطابق ممبئی پہنچنے والے طلبہ کے پاس ٹھہرنے کی جگہ نہیں تھی، اس لیے کانگریس نے انہیں اپنے دفتر ’تلک بھون‘ میں ٹھہرایا تھا۔ ان کا الزام ہے کہ پیر کی صبح ہونے سے پہلے پولیس کانگریس کے دفتر میں داخل ہوئی اور ان بچوں کو وہاں سے اٹھا کر لے گئی، جبکہ وہ آزاد میدان میں احتجاج شروع کرنے والے تھے۔

انہوں نے کہا کہ نَاسک سے پیدل چل کر ممبئی پہنچنے والے بچوں کو ان کے مطالبات کے جواب میں یہ کارروائی ملی۔ راہل گاندھی نے اس واقعے پر حکومت سے سوال کرتے ہوئے کہا کہ طلبہ کے مطالبات سننے کے بجائے ان کے ساتھ ایسا سلوک کیوں کیا جا رہا ہے۔

راہل گاندھی نے اپنی پوسٹ میں پونے میں مہاراشٹر پبلک سروس کمیشن (ایم پی ایس سی) کے امیدواروں کے ستیہ گرہ کا بھی ذکر کیا۔ انہوں نے کہا کہ ان امیدواروں کے مطالبات بھی نئے نہیں ہیں اور وہ خود وزیر اعلیٰ دیویندر فڑنویس سے ان مسائل پر بات کر چکے ہیں، لیکن اس وقت کچھ نہیں ہوا۔ ان کے مطابق اسی وجہ سے آج نوجوان سڑکوں پر احتجاج کرنے پر مجبور ہیں۔

اپنے ویڈیو پیغام میں راہل گاندھی نے کہا کہ انہوں نے ’طلبہ کی گونج‘ پروگرام کے دوران مختلف طلبہ گروپوں سے ملاقات کی تھی۔ انہوں نے قبائلی طلبہ اور ایم پی ایس سی احتجاج کرنے والے امیدواروں سے بھی بات چیت کی تھی۔ راہل گاندھی نے کہا کہ طلبہ کے مطالبات جائز ہیں اور ایم پی ایس سی کے طلبہ نے ایپ کے ذریعے بھی ان سے رابطہ کیا تھا۔

انہوں نے طلبہ کو یقین دلایا کہ کانگریس ان کے ساتھ ہے اور انہیں گھبرانے کی ضرورت نہیں ہے۔ راہل گاندھی نے حکومت سے کہا کہ وہ جو کرنا چاہتی ہے کرے، لیکن ایم پی ایس سی امیدواروں اور قبائلی طلبہ کے احتجاج رکنے والے نہیں ہیں۔ انہوں نے کہا کہ حکومت کو طلبہ کے مطالبات جلد از جلد پورے کرنے چاہئیں، کیونکہ یہ نوجوان اپنے حقوق کے لیے پیچھے ہٹنے والے نہیں ہیں۔ راہل گاندھی نے واضح کیا کہ وہ اور کانگریس پارٹی مہاراشٹر کے طلبہ کے ساتھ کھڑے ہیں اور اس معاملے میں ایک انچ بھی پیچھے نہیں ہٹیں گے۔