پنجاب: امرتسر میں گولڈن ٹیمپل کے پاس تیسرا دھماکہ، 5 افراد گرفتار

امرتسر: پنجاب کے امرتسر میں گولڈن ٹیمپل کے قریب جمعرات کو ایک اور دھماکہ ہوا جس کی وجہ سے لوگ خوف میں مبتلا ہیں۔ گولڈن ٹیمپل کے قریب یکے بعد دیگرے یہ تیسرا دھماکہ ہے۔ اس تازہ دھماکے میں کسی کے ہلاک یا زخمی ہونے کی کوئی خبر نہیں ہے۔ تاہم بدھ کی رات ایک بجے کے قریب ہونے والے اس دھماکے کی آواز دور دور تک سنی گئی اور لوگ گھروں سے باہر نکل آئے۔ دھماکے کا یہ مقام سابقہ دھماکے کے مقام سے مختلف تھا۔

پنجاب پولیس کے ڈی جی پی نے بتایا کہ دھماکوں کے سلسلے میں 5 افراد کو گرفتار کیا گیا ہے۔ اب تک ہونے والے تینوں دھماکے کم شدت کے ہیں۔ بتایا جا رہا ہے کہ یہ تازہ ترین دھماکہ گولڈن ٹیمپل کے نزیدک واقع سری گرو رام داس سرائے کے برابر والی جگہ پر ہوا جو ہیرٹیج کوریڈور کی طرف واقع ہے۔

واقعہ کی اطلاع ملتے ہی پولیس نے موقع پر پہنچ کر تفتیش شروع کر دی۔ پنجاب پولیس کی فرانزک ٹیم نے بھی دھماکے کی تحقیقات شروع کر دی ہیں۔ تاہم دھماکے کی وجہ کا ابھی تک پتہ نہیں چل سکا ہے۔ پولیس تینوں دھماکوں کی کڑیاں جوڑنے کی بھی کوشش کر رہی ہے۔

موقع پر پہنچنے والے امرتسر کے پولیس کمشنر نونہال سنگھ نے کہا ’’ہمیں رات 12:15 کے قریب اطلاع ملی کہ ایک بڑے دھماکے جیسی آواز سنی گئی ہے، ممکنہ طور پر ایک اور دھماکہ ہوا ہے۔ ہم ابھی تک اس کی تصدیق نہیں کر رہے ہیں کہ یہ ایک دھماکہ تھا۔ لوگوں کے بیانات کی تصدیقی کی جا رہی ہے۔‘‘ 8 مئی کو گولڈن ٹیمپل کے قریب ہیرٹیج اسٹریٹ میں ایک دھماکے میں ایک شخص زخمی ہوا تھا، اسی جگہ جہاں 6 مئی کو بھی دھماکہ ہوا تھا۔

سابقہ دھماکہ کی وجہ سے کچھ عمارتوں کے شیشے بھی ٹوٹ گئے تھے۔ گولڈن ٹیمپل کے ایک کلومیٹر کے دائرے میں دھماکے کی آواز سنی گئی۔ پولیس کا کہنا تھا کہ موقع پر موجود ایک عقیدت مند کرن دیپ سنگھ نے بتایا کہ آٹورکشہ میں سفر کرنے والی کچھ لڑکیوں کو شیشے کے ٹکڑے لگے انہیں معمولی چوٹیں آئیں۔ لڑکیاں ہریانہ کے پنچکولہ سے گولڈن ٹیمپل میں ماتھا ٹیکنے کے لیے پہنچی تھیں۔