اجے کمار للو کی رہائی کے لئے کانگریس کا احتجاج، متعدد کارکنان گرفتار

لکھنؤ: اتر پردیش کانگریس کے صدر اجے کمار للو کی رہائی کا مطالبہ کرتےہوئے کانگریسی کارکنوں نے سنیچر کو یوپی کے مختلف اضلاع میں احتجاجی مظاہرہ کیا۔ اس دوران پولیس نے کئی مظاہرین کو گرفتار کر لیا۔

ریاستی راجدھانی لکھنؤ میں ہونے والے احتجاج میں اک ڈاؤن کی وجہ سے پارٹی کے تقریبا 50 کارکن جی پی او تک آئے اور گاندھی کے مجسمہ کے نزدیک دھرنے پر بیٹھنے کی کوشش کی۔ تاہم پولیس نے مظاہرین کو دھرنے پر نہیں بیٹھنے دیا اور گرفتار کر کے انہیں پولیس لائن لے گئی۔ مظاہرین نے اپنے ہاتھوں میں تختیاں اور پلے کارڈ تھام رکھے تھے جن پر ریاستی صدر کی رہائی کی حمایت میں نعرے آویزاں تھے۔

ریاستی کانگریس کے میڈیا کوآرڈنیٹر للن کمار نے اس موقع پر کہا کہ ریاستی حکومت نے بے وجہ کانگریس کے ریاستی صدر کو گرفتار کیاہے۔ یوگی آدتیہ ناتھ کی حکومت پارٹی کے ریاستی صدر کے خدمت خلق کے جذبے اور عوام الناس میں ان کی مقبولیت سے خائف ہے اس لئے انہیں بلاوجہ گرفتار کیا گیا ہے۔

انہوں نے کہا، ’’ریاسی صدر للو جی کی رہائی کے لئے ریاست بھر کے تمام اضلاع میں کانگریس کارکنان اور رہنما گاندھی جی کے مجسمہ پر صبح 11 بجے سے خاموش مظاہرہ کر رہے تھے۔ یوپی حکومت اتنی خوفزدہ ہے کہ اسے خاموش مظاہرہ سے بھی ڈر لگتا ہے۔ بڑے پیمانے پر کانگریس کارکنان اور رہنماؤں کی گرفتاری کی جا رہی ہے۔

للن کمار نے بتایا کہ لکھنؤ، وارانسی، بجنور، گوتم بدھ نگر، ہاپوڑ، بلند شہر، امروہہ، فرخ آباد، سلطان پور، سہارنپور وغیرہ شہروں میں کانگریس کارکنان کو مظاہرہ کے دوران گرفتار کیا گیا۔