قاضی رشید مسعود جیسے لوگ ہماری قومی زندگی میں کم پائے جاتے ہیں: اختر الواسع

مولانا آزاد یونیورسٹی جودھپور کے وائس چانسلر، پدم شری پروفیسر اختر الواسع نے مشہورسیاسی رہنما،سابق مرکزی وزیر اور آٹھ مرتبہ رہےممبر آف پارلیمنٹ قاضی رشید مسعود صاحب کے انتقال پر اپنے گہرے دکھ کا اظہار کرتے ہوئے کہا کہ مغربی یوپی خاص طور پر اپنے قدآور،انتہائی ملنسار،کسانوں کے ہمدرد،حق و انصاف کی آواز والے رہنما سے محروم ہو گئی ہے۔

انہوں نے آج یہاں جاری ایک ریلیز میں کہا کہ قاضی صاحب گنگوہ کے نامور علمی اور سیاسی خانوادے سے تعلق رکھتے تھے اور ان کا رشتہ مولانا رشید احمد گنگوہی ؒ سے جا ملتا تھا۔وہ ایک نامور علیگیرین تھے اور مجھے ان سے اپنے طالب علمی کے زمانہ سے ہی نیاز حاصل تھاجو آخر تک جاری رہا۔

پروفیسر واسع نے کہا کہ رشید مسعود نے سیاست میں ایک نیک،دردمند اور دیانت دار رہنما کی حیثیت سے اپنی جو شبیہ بنائی وہ شروع سے آخیر تک قائم رکھی۔انہیں سیاست سے بے دخلی کا خمیازہ اپنی نیکی اور دریا دلی کی وجہ ہی سے اٹھانا پڑا جس پر انہوں نے کبھی افسوس کا اظہار نہیں کیا۔ایسے بڑے لوگ ہماری قومی زندگی میں بہت کم پائے جاتے ہیں۔

پروفیسر اختر الواسع نے دعا کی کہ اللہ مرحوم کو غریق رحمت کرے اور ان کے پسماندگان، متعلقین اور متوسلین کو صبر و جمیل عطا فرمائے۔