وزیر اعظم نریندر مودی کا یک روزہ گجرات دورہ، کئی تقاریب میں شریک ہوں گے

نئی دہلی: وزیراعظم نریندر مودی ہفتہ کو گجرات کے ایک دن کے دورے پر ہوں گے اور وہاں کوآپریٹو سیکٹر پر ایک سیمینار میں شرکت کریں گے اور افکو کی لیکویفائیڈ یوریا فیکٹری کا افتتاح سمیت چند پروگراموں میں حصہ لیں گے۔

وزیر اعظم کے دفتر سے جمعہ کوجاری کردہ ایک پریس ریلیز کے مطابق وزیر اعظم مودی اپنے دورے کے دوران راجکوٹ کے اٹکوٹ میں نئے تعمیر شدہ ماتوشری کے ڈی پی ملٹی اسپیشلٹی اسپتال کا بھی معائنہ کریں گے۔ جدید ترین سہولیات سے لیس یہ اسپتال شری پٹیل سیوا سماج کی جانب سے چلایا جاتا ہے۔ وزیر اعظم مودی وہاں ایک عوامی تقریب سے بھی خطاب کریں گے۔

یہ پروگرام صبح 10 بجے منعقد ہوگا۔ وزیراعظم شام 4 بجے گاندھی نگر کے مہاتما مندر میں کوآپریٹیو پرایک سیمینار سے خطاب کریں گے۔ ’ساہکار سے خوشحالی‘ کے موضوع پر ہونے والے اس سیمینار میں مختلف کوآپریٹو اداروں کے سرکردہ رہنما اور اراکین شرکت کریں گے۔ اس پروگرام میں کوآپریٹو سیکٹر کے 60 ہزار سے زائد نمائندوں کی شرکت متوقع ہے۔

گجرات میں کوآپریٹو تحریک بہت مضبوط ہے اوروہاں 84 ہزار سے زیادہ کوآپریٹو سوسائٹیاں چل رہی ہیں جن میں 2 کروڑ 30 لاکھ سے زیادہ ممبران شامل ہیں۔