فرخ آباد واقع کوچنگ سنٹر میں زوردار دھماکہ، 2 طلبا کی جائے وقوع پر ہی موت، 5 کی حالت سنگین

اتر پردیش کے فرخ آباد ضلع میں ہفتہ کے روز ایک اندوہناک حادثہ پیش آیا جس میں کم از کم 2 لوگوں کی موت ہو گئی۔ میڈیا ذرائع کے مطابق فرخ آباد میں ایک کوچنگ سینٹر کے اندر زوردار دھماکہ ہوا جس میں 2 طلبا کی جائے وقوع پر ہی موت ہو گئی، جبکہ 5 کی حالت سنگین بنی ہوئی ہے۔ زخمیوں کی تعداد مجموعی طور پر 10 بتائی جا رہی ہے۔ اس دھماکہ کی وجہ کا اب تک پتہ نہیں چل پایا ہے۔

بتایا جاتا ہے کہ دھماکہ اتنا زوردار تھا کہ اردگرد کا علاقہ لرز اٹھا۔ فی الحال پولیس واقعہ کی تحقیقات میں مصروف ہے۔ میڈیا ذرائع کا کہنا ہے کہ کوچنگ سنٹر میں دھماکہ کی اطلاع جیسے ہی ملی، ضلع مجسٹریٹ اور پولیس سپرنٹنڈنٹ جائے وقوع پر پہنچے اور وہاں موجود پولیس ٹیم سے مکمل جانکاری حاصل کی۔

موصولہ اطلاع کے مطابق قادری گیٹ تھانہ علاقے میں ساتن پور منڈی روڈ پر ایک کوچنگ سینٹر قائم ہے۔ ہفتہ کی شام اچانک اس کوچنگ سینٹر میں دھماکہ ہوا اور ہر طرف دھواں پھیل گیا۔ دھماکہ کی آواز سنتے ہی قریبی لوگ خوفزدہ ہو گئے اور فوراً کوچنگ سینٹر کی طرف دوڑے۔ وہاں پہنچ کر لوگوں نے دیکھا کہ کچھ طلبا زخمی حالت میں پڑے ہیں۔ مقامی لوگوں نے فوراً اس حادثہ کی اطلاع قادری گیٹ تھانہ پولیس کو دی۔

اطلاع ملتے ہی پولیس ٹیم حادثہ والی جگہ پر پہنچی۔ پولیس نے 7 زخمی طلبا کو علاج کے لیے ضلع اسپتال میں داخل کرایا، جن میں سے 2 کو ڈاکٹروں نے مردہ قرار دے دیا، جبکہ 5 کی حالت نازک دیکھتے ہوئے ان کا علاج شروع کیا گیا۔ کچھ شدید زخمی طلبا کو بہتر علاج کے لیے سیفئی میڈیکل کالج ریفر کیا گیا ہے۔ دھماکہ کے بعد کوچنگ سینٹر کی عمارت کا کچھ حصہ 20 میٹر تک بکھر گیا اور تقریباً 2 کلومیٹر تک اس دھماکہ کی آواز سنی گئی۔

پولیس کی ابتدائی تحقیقات میں بتایا گیا ہے کہ دھماکہ کی وجہ سیپٹک ٹینک میں گیس بھر جانا ہو سکتی ہے۔ جائے وقوع پر موجود فورنسک ٹیم نے معائنہ کے بعد میتھین گیس کی وجہ سے دھماکہ ہونے کا اندیشہ ظاہر کیا۔ اس واقعہ کے تعلق سے پولیس نے ایک شخص کو حراست میں لیا ہے اور کوچنگ سینٹر کے اندر سے تمام ریکارڈ ضبط کر لیے گئے ہیں۔

جائے وقوع پر ضلع مجسٹریٹ آشوتوش دویدی اور ایس پی آر تی سنگھ نے پہنچ کر حالات کا جائزہ لیا۔ اب بھی ریسکیو آپریشن جاری ہے تاکہ دیکھا جا سکے کہ ملبہ میں کوئی اور طالب علم پھنسا تو نہیں ہے۔ اس حادثہ کے بارے میں ایس پی آر تی سنگھ نے کہا کہ ’’دھماکہ کی اط لاع تقریباً 3.19 بجے ملی تھی۔ یہ ایک کوچنگ سینٹر ہے، جس کے بیسمنٹ میں ایک سیپٹک ٹینک ہے۔ ٹینک میں زیادہ مقدار میں جمع میتھین گیس بھر جانے کی وجہ سے دھماکہ ہوا۔ وہاں ایک سوئچ بورڈ بھی ملا ہے، غالباً اس کی وجہ سے دھماکہ ہوا ہوگا۔‘‘ انھوں نے مزید کہا کہ ’’اس حادثہ میں 7 لوگ زخمی ہوئے، جن میں سے 2 کی موت ہو گئی۔ واقعہ کی جانچ کی جا رہی ہے اور سی سی ٹی وی فوٹیج بھی دیکھی جا رہی ہیں۔‘‘