گڈکری کی رہائش گاہ کو بم سے اڑانے کی دھمکی دینے والا امیش وشنو راوت گرفتار

ایک نوجوان جس نے سڑک ٹرانسپورٹ اور شاہراہوں کےمرکزی وزیر نتن گڈکری کی ناگپور رہائش گاہ کو فون پر بم سے اڑانے کی دھمکی دی تھی اسے پولیس نے حراست میں لے لیا ہے یہ دھمکی ہیلپ لائن نمبر 112 پر کال کے ذریعے دی گئی۔

کال کرنے والے نے کہا تھا کہ نتن گڈکری کی رہائش گاہ کو دس منٹ کے اندر بم دھماکے سے اڑا دیا جائے گا۔ دھمکی ملتے ہی پرتاپ نگر پولیس اسٹیشن کو اطلاع دی گئی۔ پولیس افسران نے فوری طور پر وزیر کی رہائش گاہ پہنچ کر سرچ آپریشن شروع کیا تاہم انہیں تفتیش کے دوران کوئی مشکوک چیز نہیں ملی۔

جب پولیس نے کال کرنے والے کی تلاش کی تو پتہ چلا کہ یہ دھمکی آمیز کال امیش وشنو راوت نے کی تھی، جو مقامی میڈیکل اسکوائر پر واقع شراب کی دکان پر کام کرتا ہے۔ پولیس نے اسے اپنی تحویل میں لے لیا ہے اور معاملے کی تفتیش کر رہی ہے۔ اس واقعہ کے بعد گڈکری کی رہائش گاہ کے ارد گرد سیکورٹی بڑھا دی گئی۔