راجستھان میں دو سے زیادہ بچوں والے لوگ لڑ سکیں گے الیکشن، 31 سال پرانے قانون کو بدلنے کی تیاری

 جے پور:عوامی تنقید اورمختلف حلقوں سے پزور مطالبات کے بعد راجستھان حکومت نے آخرکار پنچایت، نگرپالیکا اور بلدیاتی انتخابات کے لیے دو بچوں کی شرط ختم کرنے کا فیصلہ کرلیا ہے۔ 1994 میں نافذ ہونے والے اس قانون کے تحت دو سے زیادہ بچوں والے افراد کو الیکشن لڑنے کی اجازت نہیں تھی۔ اب حکومت اس ضابطے کو ہٹانے کی سمت میں قدم اٹھا نے جارہی ہے۔ ذرائع کے مطابق آر ایس ایس کے دباؤ کے بعد حکومت نے اس قانون پر نظر ثانی شروع کر دی ہے۔ محکمہ نے آرڈیننس کا مسودہ تیار کر لیا ہے اور اسے کابینہ کو بھیجنے کی تیاری کر رہا ہے۔ امکان ہے کہ حکومت اسے قانون ساز اسمبلی کے سرمائی اجلاس میں منظوری کے لیے پیش کرے گی۔

شہری ترقیات کے وزیر جھابر سنگھ کھرا نے اشارہ کیا ہے کہ حکومت کو اس قانون کے حوالے سے متعدد میمورنڈم موصول ہوئے ہیں۔ انہوں نے کہا کہ جب لوک سبھا اور اسمبلی انتخابات میں ایسی کوئی پابندی نہیں ہے تو صرف بلدیاتی انتخابات میں ہی ایسا امتیاز کیوں؟ انہوں نے کہا کہ اگر یہ شرط ختم کردی جاتی ہے تو دیہی علاقے کی سیاست میں بڑی تبدیلی دیکھنے کومل سکتی ہے۔ ہزاروں افراد جو پہلے دو سے زائد بچے پیدا کرنے کی وجہ سے الیکشن لڑنے سے محروم تھے،وہ اب امیدوار بن سکیں گے۔

یہ قانون 1994 میں اس وقت کے وزیر اعلی بھیروں سنگھ شیخاوت کی حکومت نے آبادی پر قابو پانے کے مقصد سے نافذ کیا تھا۔ اب تین دہائیوں بعد ریاستی حکومت اسے ختم کرنے کی تیاری کر رہی ہے۔ ایک اہلکار نے بتایا کہ مجوزہ آرڈیننس کا مسودہ پنچایتی راج محکمہ نے جائزہ کے لیے محکمہ قانون کو بھیج دیا ہے۔ عہدیدار نے مزید کہا کہ منظوری کے بعد اس تجویز کو منظوری کے لیے کابینہ کے سامنے رکھا جائے گا۔

موجودہ قانون کی متعلقہ دفعات ان لوگوں کو مذکورہ انتخابات لڑنے سے روکتی ہیں جن کے یہاں 27 نومبر 1995 کے بعد تیسرے بچے کی پیدائش ہوئی ہے۔ فی الحال اس زمرے کے لوگ پنچ، سرپنچ، نائب سرپنچ، پنچایت سمیتی کے رکن، ضلع پریشد کے رکن، پردھان، ضلع پرمُکھ ، کارپوریٹر، چیئرمین یا میئر جیسے عہدوں کے لیے الیکشن نہیں لڑ سکتے۔

نا اہلی سے متعلق یہ التزام راجستھان میونسپل کارپوریشن ایکٹ کے سیکشن 24 اور پنچایتی راج ایکٹ کی متعلقہ دفعات میں موجود ہے۔ اس اقدام سے ریاست میں حکمراں بی جے پی اور اپوزیشن کانگریس دونوں پارٹیوں کے کئی رہنماؤں کو فائدہ پہنچنے کی امید ہے جو متعلقہ ایکٹ کی موجودہ دفعات کے تحت بلدیاتی اور پنچایتی راج انتخابات لڑنے کے لیے نااہل قرار دیے گئے ہیں۔ ترامیم کے نافذ ہونے کے بعد وہ ایسے الیکشن لڑ سکیں گے۔