علی گڑھ اور پوری ریاست کے عوام بی جے پی پر تالا لگائیں گے: اکھلیش یادو

علی گڑھ: سماج وادی پارٹی (ایس پی) صدر اکھلیش یادو نے کہا کہ اتر پردیش میں بھارتیہ جنتا پارٹی (بی جے پی) کی یوگی حکومت کی تفریقانہ پالیسیوں سے عوام اس قدر ناراض ہیں کہ انتخابات کے بعد علی گڑھ ہی نہیں بلکہ پوری ریاست کے عوام بی جے پی پر تالا لگا دیں گے۔

اکھلیش یادو نے ہفتہ کے روز علی گڑھ میں منعقد ایک پریس کانفرنس میں ایس پی امیدواروں کی حمایت کرنے کی اپیل کرتے ہوئے کہا کہ گزشتہ 5 سال میں عوام کی بی جے پی کے تئیں ناراضگی کا عالم یہ ہے کہ اب ریاست کے 80 فیصدی لوگ ایس پی۔ آر ایل ڈی اتحاد کے ساتھ آ گئے ہیں۔ انہوں نے بی جے پی پر آئینی اداروں کو نیست و نابود کرنے کا الزام لگاتے ہوئے کہا کہ دہلی میں نئی پارلیمنٹ عمارت تعمیر کر رہی بی جے پی آئین بھی تبدیل کر سکتی ہے۔

انہوں نے کہا کہ ’اس لئے ہم کہہ رہے ہیں کہ اترپردیش کا یہ الیکشن آئین کو بچانے کا الیکشن ہے۔ اترپردیش میں نظم ونسق کے سوال پر اکھلیش یادو نے کہا کہ جس ریاست کے وزیر اعلی اور نائب وزیر اعلی کے خلاف سب سے زیادہ مجرمانہ مقدمے درج ہوں اور وزیر اعلی ونائب وزیراعلی خود اپنے خلاف مقدمے واپس لے رہے ہوں اس ریاست کے نظم ونسق کے انتظام کا اندازہ لگایا جاسکتا ہے۔

انہوں نے ہاتھرس عصمت دری واقعہ کا بھی ذکر کرتے ہوئے کہا کہ ہاتھرس میں ایک لڑکی کے ساتھ بہیمانہ واردات تو ہوئی ساتھ ہی اسے آخری احترام بھی نہیں ملا۔ ایس پی سربراہ نے کہا کہ گزشتہ پانچ سال کے دوران حراستی اموات کے معاملے میں اترپردیش ہی سب سے آگے ہے۔

انہوں نے کہا کہ کسانوں کی آمدنی دوگنی کرنے اور دو کروڑ نوجوانوں کو روزگار دینے کا وعدہ کرنے والی بی جے پی کے اقتدار میں عوام کی کمائی نصف ہوگئی ہے۔ اور مہنگائی دو گنی ہوگئی ہے۔ اس سے عام آدمی کا گزر بسر ہی اب آسانی سے نہیں ہو پا رہا ہے۔ اکھلیش یادو نے کہا کہ اترپردیش کے لوگ کورونا بحران میں پیدا ہوئے بحران کو بھی کبھی نہیں بھول پائیں گے، جب پیدل چل کر غریب مزدوروں کو گھر جانا پڑا۔ لوگوں کو آکسیجن، دوا اور بستر تک نہیں ملے۔

انہوں نے کہا کہ ڈبل انجن کی حکومت نے عوام کو دھوکہ دیا ہے۔ کسانوں کو تین کالے قوانین کی واپسی کے لئے ایک سال تک باہر سڑکوں پر بیٹھنا پڑا۔ انہوں نے دعوی کیا کہ ایس پی کے میعاد کار میں طلبہ کو دئیے گئے لیپ ٹاپ، آج تک بند نہیں ہوئے، جبکہ بی جے پی حکومت کے وزیر اعلی یوگی آدتیہ ناتھ گرمی نکلانے کی بات کر رہے ہیں۔ اکھلیش یادو نے کہا کہ الیکشن کے بعد ایس پی کی حکومت بننے پر نوجوانوں کے لئے ’بھرتیاں‘ نکالی جائے گی۔