’خاکستر 900 دکانوں کے مالکان کو معاوضہ ملنا چاہیے‘، کانگریس نے پارلیمنٹ میں اٹھایا سورت آتشزدگی کا معاملہ

گجرات کے سورت واقع شیوشکتی ٹیکسٹائل مارکیٹ میں گزشتہ دنوں خوفناک آگ لگ گئی تھی۔ اس آتشزدگی میں سینکڑوں دکانیں خاکستر ہو گئی تھیں، جس کے نتیجے میں دکان مالکان کو شدید معاشی نقصان کا سامنا کرنا پڑا تھا۔ اس وقت وہ بے حال ہیں اور انھیں حکومت کی طرف سے کوئی معاوضہ بھی نہیں ملا ہے۔ کانگریس نے اس معاملے کو آج پارلیمنٹ میں اٹھایا اور متاثرہ دکان مالکان کے لیے نیشنل ڈیزاسٹر ریلیف فنڈ سے معاوضہ کا مطالبہ کیا۔

گجرات کانگریس کے صدر اور راجیہ سبھا میں رکن شکتی سنگھل گوہل نے ایوان بالا میں سورت آتشزدگی معاملہ کی جانکاری دیتے ہوئے کہا کہ ’’گجرات کے سورت میں شیوشکتی ٹیکسٹائل مارکیٹ میں آگ لگی، جس میں 900 دکانیں خاک ہو گئیں، لیکن انھیں (دکان مالکان کو) کوئی معاوضہ نہیں ملا۔ ایسے میں ان دکانداروں کو نیشنل ڈیزاسٹر ریلیف فنڈ سے معاوضہ دیا جائے۔‘‘

بتایا جاتا ہے کہ شیوشکتی ٹیکسٹائل مارکیٹ میں 25 فروری کو بوقت دوپہر آگ لگی تھی۔ اس آگ نے کروڑوں روپے کی نقدی، 300 کروڑ روپے سے زیادہ کے کپڑے، لین دین کا حساب اور دکان میں رکھے لیپ ٹاپ و کمپیوٹرس کو خاک میں تبدیل کر دیا۔ ایک کاروباری کا دم گھٹنے سے موت بھی واقع ہو گیا تھا۔ کئی کاروباریوں نے دوسری ریاستوں سے سورت میں آ کر اپنی تجارت قائم کی تھی، لیکن اب سب کچھ تباہ ہو چکا ہے۔ شکتی سنگھ گوہل نے راجیہ سبھا میں ان کا درد بیان کیا اور آگ بجھانے میں انتظامیہ کی لاپروائی کا بھی تذکرہ کیا۔ انھوں نے کہا کہ ’’دوپہر میں 1.30 بجے آگ لگی۔ فائر بریگیڈ نے آگ بجھائی اور کہا کہ سب قابو میں ہے، جبکہ دھواں اٹھ رہا تھا۔ یعنی لاپروائی کی گئی۔ اس کا نتیجہ یہ ہوا کہ اسی رات ایک بجے آگ پھر سے بھڑک اٹھی اور سب کچھ خاک ہو گیا۔ اسی طرح 2020 میں بھی حادثہ ہوا تھا، جس سے حکومت نے کوئی سبق نہیں لیا۔‘‘

کانگریس رکن پارلیمنٹ نے ایوان بالا میں اپنی بات جاری رکھتے ہوئے کہا کہ ’’فائر بریگیڈ محکمہ کے ایک افسر سے میری بات ہوئی تو انھوں نے بتایا کہ ہمارے پاس ایسے حادثات کے لیے اسپیشل کیمیکل کا اسٹاک نہیں تھا، جسے آگ بجھانے کے لیے پانی میں ملا کر استعمال کیا جاتا ہے۔‘‘ وہ مزید کہتے ہیں کہ ’’سورت جیسے شہر کے تئیں ایسی لاپروائی درست نہیں ہے۔ میرا مطالبہ ہے کہ سورت شہر کے کاروباریوں کی فکر پر توجہ دی جائے اور انھیں معاوضہ دیا جائے۔‘‘