کرگل وجے دیوس: کیپٹن وجینت تھاپر سمیت 65 شہیدوں کے اہل خانہ کی فوج نے عزت افزائی کی

نئی دہلی: ہندوستانی فوج نے کرگل وجے دیوس کی 26ویں سالگرہ کے موقع پر ملک کے ان بہادر سپوتوں کو خراج عقیدت پیش کرتے ہوئے ایک قابل ستائش اقدام کیا ہے۔ فوج نے منگل کے روز کیپٹن وجینت تھاپر (ویر چکر) سمیت 65 شہیدوں کے اہل خانہ کی ان کے گھروں پر جا کر عزت افزائی کی۔ یہ تقریب فوج کی جانب سے ڈیڑھ ماہ طویل مہم کا حصہ ہے، جو وجے دیوس یعنی 26 جولائی تک جاری رہے گی۔

فوج نے ایک بیان میں کہا ہے کہ ان تقریبات کا مقصد شہداء کی بے مثال قربانیوں کو یاد کرنا اور ان کے اہل خانہ کو یہ احساس دلانا ہے کہ ان کے پیاروں کی قربانیاں نہ صرف یاد رکھی جاتی ہیں بلکہ قوم کا فخر بھی ہیں۔ کیپٹن وجینت تھاپر کے نوئیڈا میں واقع گھر پر فوج کے افسران نے پہنچ کر ان کے والدین کو مومنٹو اور اظہار تشکر کا خط پیش کیا۔ اس موقع پر فوج نے ان کی جرات اور قربانی کو سلام پیش کیا۔

یہی جذبہ دیگر شہداء کے اہل خانہ کے ساتھ بھی ظاہر کیا گیا۔ فوج کے افسران نے دہلی میں ویر چکر یافتہ رائفل مین انسویا پرساد کی اہلیہ، جے پور میں حولدار بستی رام کی اہلیہ، کروکشیتر میں لانس نائیک گرمیل سنگھ کے والدین، راجستھان کے ویشالی نگر میں نائیک آنند سنگھ کی اہلیہ اور دہرادون میں سینا میڈل یافتہ حولدار ہری اوم کے اہل خانہ سے ملاقات کی اور ان کی عزت افزائی کی۔

فوج کا کہنا ہے کہ یہ صرف ایک رسمی اقدام نہیں بلکہ ایک زندہ جذبہ ہے۔ فوج کے مطابق، ’’ہم اپنے بہادر ساتھیوں کو کبھی نہیں بھولتے اور نہ کبھی بھولیں گے۔ ان کے اہل خانہ ہمارے خاندان کا حصہ ہیں اور ہندوستانی فوج ہمیشہ ان کے ساتھ کھڑی رہے گی۔‘‘

اس جذباتی پہل کے دوران کئی اہل خانہ آنکھوں میں آنسو لیے فوج کے اس خراج کو سراہتے نظر آئے۔ ان کا کہنا تھا کہ یہ اقدامات انہیں نہ صرف حوصلہ دیتے ہیں بلکہ یہ یقین بھی دلاتے ہیں کہ ان کے پیاروں کی قربانیاں رائیگاں نہیں گئیں۔

فوج کی طرف سے دی جانے والی یہ عزت افزائی ایک مضبوط پیغام بھی ہے کہ ملک اپنے بہادر سپاہیوں کو کبھی فراموش نہیں کرتا۔ 1999 کی کرگل جنگ میں شہید ہونے والے ان سپاہیوں کی قربانیاں آج بھی قوم کے دلوں میں زندہ ہیں اور فوج کی یہ مہم ان یادوں کو مزید تازہ کرتی ہے۔

فوج نے اعلان کیا ہے کہ کرگل وجے دیوس تک مختلف تقریبات کا انعقاد جاری رہے گا، جن میں شہداء کو خراج عقیدت پیش کرنے کے ساتھ ساتھ نوجوان نسل کو ان کی بہادری اور قربانی کے بارے میں آگاہ کیا جائے گا۔

(یو این آئی ان پٹ کے ساتھ)