اب مدھیہ پردیش کی وزیر نے دیا عجیب بیان، ’کورونا سے نمٹنے کے لیے یگیہ کیجیے‘

ہندوستان میں کورونا کے بڑھتے قہر کے درمیان بی جے پی لیڈروں اور وزراء کے عجیب و غریب بیانات بھی سامنے آ رہے ہیں۔ تازہ بیان مدھیہ پردیش کے وزیر برائے سیاحت و ثقافت اوشا ٹھاکر نے دیا ہے۔ انھوں نے کہا ہے کہ ’’یگیہ کرنے سے کورونا کی تیسری لہر ہندوستان کو نہیں چھو پائے گی۔‘‘ دراصل گزشتہ دنوں ماہرین کی طرف سے کورونا کی تیسری لہر آنے کی تنبیہ کی گئی تھی جس سے لوگوں میں خوف پیدا ہو گیا ہے۔ اسی تیسری لہر سے بچنے کے لیے اوشا ٹھاکر نے یگیہ کرنے کی صلاح دی ہے۔

اوشا ٹھاکر نے اپنے بیان میں یہ بھی کہا ہے کہ ماحولیات کو صاف و شفاف کرنے کے لیے یگیہ کر کے اس میں دو-دو آہوتی سبھی ڈالیں۔ انھوں نے مزید کہا کہ ’’یہ اَندھ وشواس نہیں ہے بلکہ ماحولیات کو صاف کرنے کے لیے یگیہ علاج ہے۔ کورونا کی تیسری لہر کے تئیں سبھی لوگ بیدار ہوں۔‘‘

غور طلب ہے کہ مرکزی حکومت کے مشیر برائے صحت ڈاکٹر کے وجے راگھون نے گزشتہ دنوں تنبیہ کرتے ہوئے کہا تھا کہ ملک میں کورونا کی مزید ایک لہر ضرور آئے گی۔ انھوں نے یہ بھی کہا تھا کہ چونکہ کورونا کی دوسری لہر کے دوران کافی معاملے آ رہے ہیں، اس لیے کورونا کی تیسری لہر کب تک آئے گی، اس بارے میں ابھی کچھ بھی کہنا مشکل ہے، لیکن یہ لہر ضرور آئے گی۔ حالانکہ بعد میں انھوں نے یہ بیان دیا تھا کہ اگر لوگ ٹھیک طرح سے اگلی لہر کے تئیں بیدار ہو جائیں تو اس لہر کی تباہی کچھ کم ہو سکتی ہے، یا پھر لہر نہیں بھی آ سکتی ہے۔ ایسے میں کئی ریاستی حکومتیں مزید ایک لہر کی تنبیہ کے درمیان اپنی طبی خدمات کو بہتر کرنے میں مصروف ہو گئی ہیں۔