کورونا ویکسین پر صرف بہار کا نہیں، پورے ملک کا حق، سبھی کو مفت ملنی چاہیے: کیجریوال

نئی دہلی: بھارتیہ جنتا پارٹی (بی جے پی) کے بہار اسمبلی الیکشن کے لئے سنکلپ پتر میں ریاست کےلوگوں کو کورونا ویکسن مفت مہیا کرانے کے وعدے پر دہلی کے وزیراعلی اروند کیجریوال نے ہفتے کو بی جے پی کو گھیرا اور کہا کہ اس پر سبھی کا حق ہے اور یہ پورے ملک میں فری ملنی چاہیے۔ شمال مشرقی دہلی کے شاستری پارک کے نزدیک سیلم پور فلائی اوور کو عوام کو مختص کرنے آئے دہلی کے وزیر اعلیٰ اروند کیجریوال نے کہا کہ کورونا ویکسن بہار میں ہی کیوں، پورے ملک کو مفت میں مہیا ہونی چاہیے۔ ملک میں سبھی لوگ کورونا سے پریشان ہیں۔ یہ پورے ملک کا حق ہے۔ انہوں نے کہا کہ جب عالمی وبا کووڈ- 19 کی ویکسن آئے گی تو دیکھتے ہیں کہ کتنے کی اور کیسی ہے۔

اروند کیجریوال نے بی جے پی کے اس وعدے پر سوال کیا اور کہا کہ غیر بی جے پی حکومت والی ریاستوں کا کیا ہوگا؟ جنہوں نے بی جے پی کو ووٹ نہیں دیا، انہیں یہ ٹیکا مفت میں نہیں دیا جائےگا؟ انہوں نے کہا کہ اس فلائی اوور کی اندازاً لاگت 303 کروڑ روپے تھی جبکہ یہ 250 کروڑ روپے میں بن کر تیار ہوا ہے۔ دہلی کی ایماندار حکومت نے دارالحکومت کے عوام کے 53کروڑ روپے بچائے۔

وزیر خزانہ نرملا سیتارمن نے جمعرات کو بہار اسمبلی انتخابات کے لئے پارٹی کا سنکلپ پتر(انتخابی منشور) جاری کیا تھا جس میں یہ وعدہ کیاگیا ہے کہ حکومت بننے پر ریاست میں کورونا ویکسن سبھی کو مفت مہیا کرائی جائے گی۔ بہار اسمبلی کا الیکشن بی جے پی قومی جمہوریہ اتحاد (این ڈی اے) کے اتحادی کے طور پر وزیراعلی نتیش کمار کی قیادت میں لڑ رہی ہے۔

اس سے پہلے بی جے پی کے کورونا ویکسن کے وعدے پر کانگریس کے سابق صدر راہل گاندھی نے بھی ٹوئٹ کرکے نشانہ لگاتے ہوئے کہا تھا۔ ’’ہندوستانی حکومت نے کووڈ تقسیم کا اعلان کردیا ہے۔ یہ جاننے کے لئے ویکسن اور جھوٹے وعدے آپ کو کب ملیں گے، مہربانی کرکے اپنی ریاست کے چناؤ کی تاریخ دیکھیں۔‘‘