نوئیڈا انجینئر موت معاملہ: الٰہ آباد ہائی کورٹ نے بلڈر ابھے کمار کی فوری رہائی کا دیا حکم

نوئیڈا سیکٹر-150 کے ایک گڑھے میں گر کر سافٹ ویئر انجینئر یووراج مہتا کی موت کے معاملے میں گرفتار بلڈر ابھے کمار کو الٰہ آباد ہائی کورٹ نے بڑی راحت دی ہے۔ عدالت نے بلڈر کو غیر قانونی حراست سے فوری طور پر رہا کرنے کا حکم دیا ہے۔ بلڈر نے ’ہیبس کارپس کی رٹ‘ داخل کی تھی، جسے منظور کر لیا گیا۔ ڈبل بنچ میں شامل جسٹس سدھارتھ اور جسٹس جے کرشنا اپادھیائے نے سماعت کرتے ہوئے یہ فیصلہ سنایا ہے۔

وِش ٹاؤن کے ڈائریکٹر ابھے کمار نے ہائی کورٹ میں عرضی داخل کی تھی، جس میں گرفتاری اور حراست کو غیر قانوی، کالعدم اور باطل قرار دینے کا مطالبہ کیا گیا تھا۔ عرضی میں ابھے کمار کی جانب سے دلیل دی گئی تھی کہ پولیس نے گرفتاری میمو کی شق 13 کی تعمیل نہیں کی اور نہ ہی عرضی گزار کو پہلے سے اس کے متعلق کوئی اطلاع دی گئی تھی۔

ابھے کمار کے وکیل نے عدالت میں دلیل دی کہ پولیس کے ذریعہ گرفتاری کے قواعد و ضوابط کی خلاف ورزی کی گئی ہے۔ عدالت نے بھی دلیل کو تسلیم کیا کہ طریقہ کار پر عمل نہیں کیا گیا اور اس میں کئی خامیاں بھی ہیں۔ دلائل سننے کے بعد عدالت نے متعلقہ اتھارٹی کو ہدایت دی کہ عرضی گزار ابھے کمار کو فوری طور پر رہا کیا جائے۔ عدالت نے ایڈیشنل گورنمنٹ ایڈووکیٹ (اے جی اے) کو حکم دیا کہ وہ متعلقہ افسران کو اس فیصلے پر فوری عمل درآمد کے لیے مطلع کریں اور فیصلے کی تصدیق شدہ کاپی کا انتظار نہ کریں۔

واضح رہے کہ اترپردیش کے نوئیڈا میں 16 جنوری کی رات سیکٹر-150 میں سافٹ ویئر انجینئر یووراج مہتا کی ایک زیر تعمیر سائٹ کے گڑھے میں گرنے کی وجہ سے موت ہو گئی تھی۔ اس کے بعد نوئیڈا اتھارٹی کے ساتھ ساتھ بلڈر کے خلاف بھی کارروائی کا مطالبہ اٹھا تھا، اور اس معاملے نے کافی طول پکڑا تھا۔ جس کے بعد پولیس نے بلڈر سمیت کئی دیگر افراد کو گرفتار کر لیا تھا۔