ناقابل تسخیر قلعہ ہےمودی کی نئی 12 کروڑ کی مرسڈیز کار

وزیر اعظم نریندر مودی کے قافلے میں چلنے والی نئی مرسڈیز میبیک کسی ناقابل تسخیر قلعے سے کم نہیں ہے۔ حال ہی میں مسٹر مودی کے قافلے میں 12 کروڑ روپے کی اس کار کو دیکھا گیا تھا ۔

قابل ذکر ہے کہ روس کے صدر ولادیمیر پوتن جب حال ہی میں ہندوستان کے دورے پر آئے تھے، تو مسٹر مودی نے نئی دہلی کے حیدرآباد ہاؤس میں ان کا استقبال کیا تھا ۔ اس وقت دنیا کے ان دو سرکردہ رہنماؤں کے علاوہ وہاں موجود لوگوں کے لئے یہ کار توجہ کا مرکز بنی ہوئی تھی۔

12 کروڑ روپے کی مرسڈیز میبیک ایس 650 کار میں ایسی فل پروف سکیورٹی ہے کہ اس پر اے کے 47 سے داغی گئی گولیوں سے لے کر کسی بم دھماکے کا بھی اثر نہیں ہوتا ۔ مرسڈیزمیبیک 650 گارڈ وی آر 10 سطحی سکیورٹی کے ساتھ ایک جدید ترین ماڈل ہے۔ اس کے علاوہ اس کا سکیورٹی سسٹم بہترین کلاس کا ہے۔

ہندوستان میں وزیر اعظم کی سکیورٹی کے لیے ایس پی جی ایک وقف تنظیم ہے ۔ ایس پی جی ہی ہے جو وزیر اعظم کے حفاظتی انتظامات کا وقتاً فوقتاً جائزہ لیتی ہے اور یہ فیصلہ کرتی ہے کہ وزیر اعظم کی گاڑی یا سکیورٹی سے متعلق کس جہت کو درست کرنے کی ضرورت ہے۔

مرسڈیز میبیک ایس 650 گارڈ میں6.0 لیٹر ٹوئن-ٹربو وی 12 انجن ہوتا ہے ۔ یہ 516 بی ایچ پی پاور اور 900 این ایم ٹارک دیتا ہے۔ کار کی ٹاپ سپیڈ 160 کلومیٹر فی گھنٹہ ہے ۔ اس کار کا سخت ا سٹیل کور گولی یا کسی بھی دھماکے کو برداشت کر سکتا ہے۔ کار میں سوار افراد دو کلو میٹر کی دوری پر ہونے والے 15 کلوگرام تک کے ٹی این ٹی دھماکے سے بھی محفوظ رہ سکتے ہیں ۔

واضح رہے کہ وزیر اعظم مودی دنیا کے ان رہنماؤں میں شامل ہیں ، جن کو دہشت گردوں سے سب سے زیادہ خطرہ ہے ۔ وزیر اعظم بننے سے پہلے سال 2013 میں مسٹر مودی کی پٹنہ میں ہنکار ریلی ہوئی تھی۔ اس دوران یکے بعد دیگرے دھماکوں میں 6 افراد ہلاک ہوئے تھے جبکہ متعدد زخمی ہوئے تھے ۔