جھارکھنڈ: نکسلیوں نے سی آر پی ایف اہلکاروں پر کیا حملہ، آئی ای ڈی دھماکے میں فوجی شہید، دو دیگر زخمی

رانچی: جھارکھنڈ میں نکسلیوں کی ایک بار پھر بزدلانہ حرکت سامنے آئی ہے۔ گزشتہ دیر رات نکسلیوں نے مغربی سنگھ بھوم ضلع کے سرنڈا جنگل میں دو مختلف مقامات پر آئی ای ڈی دھماکے کر کے سیکورٹی فورسز کو نشانہ بنایا۔ اس حملے میں سی آر پی ایف کے ہیڈ کانسٹیبل مہندر لشکر شہید ہو گئے جبکہ دو جوان انسپکٹر کوشل کمار مشرا اور سب انسپکٹر رام چندر گوگی زخمی ہوئے۔ یہ حملہ نکسلیوں کی طرف سے منائے جانے والے ’ہفتہ مزاحمت‘ کے دوران ہوا، جس سے پورے علاقے میں دہشت کا ماحول پیدا ہو گیا۔

خبروں کے مطابق ضلع پولیس، سی آر پی ایف کی 60 ویں بٹالین اور دیگر سیکورٹی فورسز ایک مشترکہ نکسل مخالف آپریشن کر رہے تھے۔ اس دوران جھرائی کیلا تھانہ علاقے کے سمٹھا گاوں کے بابو ڈیرا علاقے میں نکسلیوں نے گھات لگا کر حملہ کردیا۔ پہلے آئی ای ڈی دھماکے میں ہیڈ کانسٹیبل مہیندر لشکر شدید طور سے زخمی ہو گئے جن کی بعد میں علاج کے دوران موت ہوگئی۔ وہیں دوسرے دھماکے میں انسپکٹر کے کے مشرا اور سب انسپکٹر رام چندر گوگی زخمی ہو گئے۔ دونوں کو راؤرکیلا کے اپولو اسپتال لے جایا گیا، جہاں ان کا علاج کیا جا رہا ہے۔

شہید مہندر لشکر آسام کے ناگون ضلع کے رہنے والے تھے۔ ان کے جسد خاکی کو رانچی لایا جا رہا ہے، جہاں سی آر پی ایف کیمپ میں انہیں پورے سرکاری اعزاز کے ساتھ آخری الوداعی دی جائے گی۔ پولیس سپرنٹنڈنٹ امت رینو نے بتایا کہ واقعہ کے فوراً بعد علاقے میں تلاشی مہم تیز کر دی گئی ہے اور نکسلیوں کی تلاش جاری ہے۔ ایک اور حملے میں نکسلیوں نے ایک پل کو بھی دھماکے سے اڑا دیا جس سے مقامی آمد و رفت بند ہوگئی ہے۔

نکسلیوں کی طرف سے یہ حملہ 8 سے 15 اکتوبر تک منائے جا رہے ’ہفتہ مزاحمت‘ کے درمیان ہوا ہے۔ اس دوران سیکورٹی فورسز کو نشانہ بنانے کی سازشیں کی جا رہی ہیں۔ سیکورٹی ایجنسیوں کو خدشہ ہے کہ نکسلی علاقے میں کسی بڑے حملے کی منصوبہ بندی کر رہے ہیں۔ سرنڈا جنگل طویل عرصے سے نکسلیوں کا گڑھ مانا جاتا رہا ہے، حالانکہ حالیہ برسوں میں ان کی طاقت کمزور ہوئی ہے۔ حال ہی میں کئی نکسلیوں نے ڈی جی پی انوراگ گپتا کے سامنے خود سپردگی کی تھی لیکن اس حملے سے ظاہر ہوتا ہے کہ تنظیم اب بھی سرگرم ہے اور انتقامی سرگرمیوں میں مصروف ہے۔