روہتک میں قومی کھلاڑی کا وحشیانہ قتل، شادی میں تنازعہ کے بعد باراتیوں نے کیا حملہ

روہتک ضلع کے ہمایوں پور گاؤں سے تعلق رکھنے والے 28 سالہ قومی پیرا پاور لفٹنگ کھلاڑی روہت نے دو دن تک موت سے جنگ لڑنے کے بعد آخرکار پنڈت بی ڈی شرما (پی جی آئی ایم ایس) اسپتال روہتک میں زخموں کی تاب نہ لاکردم توڑ دیا۔ پاور لفٹر روہت پر بھیوانی میں شادی کی تقریب کے بعد باراتیوں نے حملہ کیا تھا جس میں انہیں سنگین چوٹیں آئی تھیں۔

شائع خبروں کے مطابق جمعرات (27 نومبر) کی شام کو روہت اپنے دوست کے ساتھ اپنے رشتہ دار کے گھر شادی کی تقریب میں شرکت کے لیے بھیوانی گیا تھا۔ شادی کی تقریب کے دوران باراتیوں کی مبینہ بدسلوکی پر اعتراض کرنے کی وجہ سے روہت کا ان سے جھگڑا ہوگیا تھا۔ شادی کی تقریب ختم ہونے کے بعد جب روہت اور اس کے دوست روہتک واپس آ رہے تھے تبھی راستے میں 15 سے 20  باراتیوں نے انہیں گھیر لیا۔ روہت کے دوست کے مطابق ملزمین نے روہت پر لوہے کی سلاخوں اور ہاکی اسٹکس سے وحشیانہ حملہ کردیا۔ دوست کسی طرح جان بچا کر وہاں سے بچ نکلنے میں کامیاب رہا۔

زخمی حالت میں روہت کو پہلے بھیوانی کے جنرل اسپتال میں داخل کرایا گیا تھا لیکن حالت تشویشناک ہونے کے پیش نظر اسے پی جی آئی روہتک ریفر کر دیا گیا ۔ دو دن علاج کے باوجود روہت اسپتال میں دم توڑ گیا۔ بتایا جاتا ہے کہ روہت ملک کے مشہور پیرا پاور لفٹر تھے۔ ان کے چچا کپتان سنگھ نے بتایا کہ روہت دو بار جونیئر پیرا نیشنل ریکارڈ ہولڈر اور7 بار سینئر پیرا نیشنل چیمپئن رہے تھے۔ انہوں نے پیرا پاور لفٹنگ میں بین الاقوامی سطح پر ہندوستان کی نمائندگی بھی کی۔

بھیوانی پولیس کے تفتیشی افسر دیویندر کمار نے بتایا کہ روہت اپنے دوست کی بہن کی سسرال میں شادی کی تقریب میں گیا تھا۔ ورمالا رسم کے دوران باراتیوں کے ذریعہ کی گئی بدسلوکی کو لے کر کہا سنی ہوئی تھی۔ اس جھگڑے کے سبب شادی سے لوٹتے وقت باراتیوں نے راستے میں گھیر کر روہت اور اس کے دوست پر وحشیانہ حملہ کر کے انہیں بری طرح زخمی کر دیا۔

کہا جارہا ہے کہ بارات ضلع بھیوانی کے تگڑانا گاؤں سے آئی تھی۔ پولیس نے معاملے میں فوری کارروائی کرتے ہوئے تقریباً 6 افراد کو حراست میں لے لیا ہے اور حملے میں استعمال کی گئی گاڑی کو بھی قبضے میں لے لیا ہے۔ پولیس کا کہنا ہے کہ کھلاڑی کی موت کی تحقیقات جاری ہیں اور جو بھی قصوروار پایا جائے گا اس کے خلاف سخت کارروائی کی جائے گی۔