اہم خبر: کوشش کرنے والے کبھی شکست نہیں کھاتے، اسرو کے سربراہ شیون

بنگلورو: انڈین اسپیس تحقیقی تنظیم (اسرو) کے سربراہ کے شیون نے چندریان۔2 کے لینڈر وکرم سے رابطہ ٹوٹنے کے بعد اسرو کے مشنوں کا ذکر کرتے ہوئے سنیچر کو کہا ہے کہ کوشش کرنے والے کبھی ہار نہیں مانتے۔ ڈاکٹر شیون نے انگلینڈ کے سابق وزیراعظم اور سیاستداں ونسٹن چرچل کے خیالات کا ذکر کرتے ہوئے ٹوئٹ کیا کہ ’نہ توکامیابی آخری ہے اور نہ ناکامیابی خطرناک ہے۔‘‘

انہوں نے کئی ٹوئٹ کیے اور اسرو کے کئی مشنوں کی اطلاع دی۔ ڈاکٹر شیون نے کہا کہ اسٹرواسیٹ، آدتیہ ایل۔1، گنگایان، منگل یان۔2 اور چندریان۔3 اسرو کے بڑے مشن ہیں۔ واضح رہے کہ چاند کی سطح پر اترنے سے محض 1ء2 کلومیٹر پہلے تک چندریان۔2 مہم منصوبہ بند پروگرام کے تحت آگے بڑھ رہا تھا لیکن آخری وقت میں وکرم لینڈر سے رابطہ ٹوٹ گیا۔

کانگریس نے ٹوئٹر کے ذریعہ بتایا کہ حکومت کو معاشی بحران کے سلسلے میں یہ بہانا بنانا بند کرنا چاہئے کہ لوگوں نے گاڑی خریدنا چھوڑ کر کیب جیسے متبادل کا استعمال شروع کر دیا ہے اور کچھ لوگ الیکٹرونک گاڑی خرید رہے ہیں اس لئے آٹوموبايل کے شعبے میں گراوٹ آئی ہے۔

پارٹی نے کہا ’’حقیقت یہ ہے کہ نوٹ بندی اور غلط طریقے سے جی ایس ٹی نافذ کرنے کی وجہ سے ملک کواقتصادی بحران کا سامنا ہے اور حکومت کو اس حقیقت کو تسلیم کرکے اس پر قابو پانے کی کوشش کرنی چاہئے۔‘‘

قومی حفاظتی مشیر اجیت ڈووال نے نظر بند کشمیری لیڈروں کے بارے میں کہا ہے کہ وہ صرف نظر بند ہیں اور ان کے اوپر کوئی الزام عائد نہیں کیا گیا ہے۔ انھوں نے کہا کہ ’’اگر کشمیری لیڈروں کو نظر بند نہیں کیا جاتا تو نظامِ قانون برقرار رکھنے میں مشکلیں پیدا ہو سکتی تھیں اور اگر جلسے ہوتے تو دہشت گرد ان حالات کا استعمال کرتے۔‘‘ انھوں نے مزید کہا کہ ’’جموں و کشمیر کے کسی مقامی لیڈر پر ملک سے غداری یا مجرمانہ معاملوں کا الزام عائد نہیں کیا گیا ہے۔ جب تک جمہوریت میں کام کرنے کے لیے ماحول نہیں بنتا، اس وقت تک وہ لوگ نظر بند رہیں گے۔ پوری امید ہے کہ جلد ہی وہاں کے حالات بدلیں گے۔‘‘

لکھنؤ: سماجوادی پارٹی(ایس پی) سربراہ اکھلیش یادو نے سنیچر کو اترپردیش قانون ساز اسمبلی کی گریجویٹ سیٹوں کے لئے پانچ امیدواروں کے ناموں کا اعلان کیا ہے۔

سماج وادی پارٹی کی جانب سے جاری فہرست کے مطابق ڈاکٹر اسیم یادو کو آگرہ، رام سنہا رانا کو لکھنؤ،ڈاکٹر مان سنگھ کو الہ آباد۔جھانسی،آشوتوش سنہا کو ورانسی اور شمشاد احمد ملک کو میرٹھ گریجویٹ اسمبلی حلقوں سے امیدوار بنایا گیاہے۔ اترپردیش قانون ساز اسمبلی میں گریجویٹ اینڈ ٹیچر زمرے سے منتخب 11 اراکین کی میعاد کار 06مئی 2020 میں پوری ہوجائے گی۔

پاکستان نے ہندوستانی صدر رام ناتھ کووند کا طیارہ اپنے ائیر اسپیس سے گزرنے دینے کی اجازت نہیں دی۔ ہندوستان نے پاکستان سے صدر جمہوریہ کے آئس لینڈ دورہ کے لیے اس کا ائیر اسپیس استعمال کرنے کی اجازت مانگی تھی، لیکن پاکستان کے وزیر خارجہ شاہ محمود قریشی نے کہا کہ انھوں نے ہندوستان کی اس اپیل کو مسترد کر دیا ہے۔ واضح رہے کہ کووند پیر کے روز آئس لینڈ کے دورہ پر روانہ ہونے والے ہیں اور وہ سوئٹزرلینڈ اور سلووینیا کا بھی دورہ کریں گے۔

بالی ووڈ اداکار اکشے کمار نے چندریان-2 کے ناکام ہونے کے بعد یہیں سے چندریان-3 کے سفر کے آغاز کا تذکرہ اپنے ٹوئٹ میں کیا ہے۔ انھوں نے لکھا ہے کہ ’’کوئی بھی سائنس بغیر تجربہ کے نہیں ہوتا۔ اس چیز میں ہم کبھی کامیاب ہو جاتے ہیں تو کبھی کچھ نیا سیکھتے ہیں۔ اِسرو کے بہترین سائنسدانوں کو میرا سلام ہے، ہمیں ان پر فخر ہے اور پورا بھروسہ ہے کہ ہم چندریان-2 کے ذریعہ ہی چندریان-3 کا سفر طے کریں گے۔ ہم دوبارہ اٹھ کھڑے ہوں گے۔‘‘

کانگریس جنرل سکریٹری پرینکا گاندھی نے معیشت کے ایشو پر مودی حکومت کو تنقید کا نشانہ بنایا ہے۔ انھوں نے ٹوئٹ کیا ہے کہ ’’بی جے پی حکومت 100 دن کا جشن منانے جا رہی ہے۔ لیکن آٹو سیکٹر، ٹرانسپورٹ سیکٹر، مائننگ سیکٹر کو تو یہ جشن بربادی کے جشن جیسا لگے گا۔ ہر سیکٹر سے ایک کے بعد ایک پلانٹ بند ہونے اور ملازمتیں جانے کی خبریں آ رہی ہیں۔‘‘ انھوں نے مزید کہا کہ یہ وقت جشن منانے کا نہیں بلکہ معیشت میں بھروسہ بنانے کا ہے۔ پرینکا نے پوچھا کہ ’’کیا حکومت کے پاس اس سچ کے اعتراف کی ہمت ہے؟‘‘

چندریان-2 مشن کے دوران سافٹ لینڈنگ میں ناکامی کے بعد کانگریس جنرل سکریٹری پرینکا گاندھی نے اِسرو ٹیم کے ہر رکن کی حوصلہ افزائی کی ہے اور کہا ہے کہ پورا ملک ان پر بھروسہ کرتا ہے۔ انھوں نے اپنے ٹوئٹ میں لکھا ہے کہ ’’اِسرو میں کام کرنے والے ہر شخص پر ہمیں فخر ہے۔ ناکامی سفر کا ایک حصہ ہے، اس کے بغیر کوئی کامیاب نہیں ہو سکتا۔ پورا ملک آپ کے ساتھ کھڑا ہے اور آپ پر بھروسہ کرتا ہے۔‘‘

کانگریس نے یو پی میں ایک افسر کے ذریعہ کودکشی کرنے کے واقعہ پر یوگی حکومت کو تنقید کا نشانہ بنایا ہے۔ کانگریس نے ٹوئٹ کر کہا ہے کہ یہ واقعہ بی جے پی حکومت کی خراب حکمرانی کا نتیجہ ہے۔ کانگریس کا کہنا ہے کہ یوگی حکومت میں اگر ایک افسر اپنی زندگی گزارنے میں اچھا محسوس نہیں کر رہا ہے تو پھر عام لوگوں کی حالت کیا ہوگی۔

جموں و کشمیر کے سوپور میں دہشت گردوں کے ذریعہ عام لوگوں پر اندھا دھند گولی چلائے جانے کی خبریں موصول ہو رہی ہیں۔ اس گولی باری کے واقعہ میں ایک بچی سمیت 4 لوگ زخمی ہو گئے ہیں۔ زخمیوں کو قریب کے ایک اسپتال میں بغرض علاج داخل کرایا گیا ہے۔