زوبین گرگ کی موت کے 40 دن بعد بھی معمہ برقرار، گورو گوگوئی نے ایس آئی ٹی پر اٹھائے سوال

آسام کانگریس کے صدر اور لوک سبھا میں پارٹی کے ڈپٹی لیڈر گورو گوگوئی نے بدھ کے روز مشہور گلوکار زوبین گرگ کی موت کی تحقیقات پر سوال اٹھاتے ہوئے ریاستی حکومت کو سخت تنقید کا نشانہ بنایا۔ انہوں نے الزام لگایا کہ 40 دن سے زیادہ وقت گزر جانے کے باوجود زوبین گرگ کی موت کی اصل وجہ سامنے نہیں آئی، جو ایس آئی ٹی (خصوصی تحقیقاتی ٹیم) کی کارکردگی پر سنگین سوال اٹھاتا ہے۔

گورو گوگوئی نے ایک عوامی تقریب میں کہا، ’’یہ افسوسناک ہے کہ آسام کے سپوت، لاکھوں دلوں کے محبوب گلوکار زوبین گرگ کے ساتھ دراصل کیا ہوا، یہ آج بھی ایک راز ہے۔ 40 دن گزر گئے لیکن حکومت کے پاس اب تک کوئی واضح جواب نہیں ہے۔ آخر ایس آئی ٹی کیا کر رہی ہے؟‘‘

انہوں نے کہا، ’’حکومت کو عوام کا دھیان بھٹکانے کے بجائے اس معاملے کی سچائی سامنے لانے پر توجہ دینی چاہیے۔ ایس آئی ٹی کو بے گناہوں، دانشوروں، فنکاروں اور اپوزیشن رہنماؤں کو نشانہ بنانے کے بجائے زوبین گرگ کے ساتھ پیش آئے واقعے کی تہہ تک پہنچنا چاہیے۔‘‘

کانگریس رہنما نے الزام لگایا کہ ریاست کی بی جے پی حکومت بدعنوانی میں ڈوبی ہوئی ہے اور وزیر اعلیٰ ہمنتا بسوا سرما کے رویے سے عوام تنگ آ چکے ہیں۔ ان کے مطابق، ’’عوام بڑھتی بدعنوانی، اقتدار کے غلط استعمال اور وزیر اعلیٰ کے اہل خانہ و قریبی ساتھیوں کی غیر قانونی دولت سے پریشان ہیں۔‘‘

گورو گوگوئی نے مزید کہا کہ بی جے پی اب عوامی جماعت نہیں رہی بلکہ ایک محدود مفاد رکھنے والی کمپنی بن چکی ہے جو صرف چند لوگوں کی خدمت میں مصروف ہے۔ ’’اسی لیے بی جے پی کے کئی رہنما اور کارکن اب پارٹی چھوڑ کر کانگریس میں شامل ہو رہے ہیں،‘‘ انہوں نے دعویٰ کیا۔

انہوں نے کہا کہ زوبین گرگ جیسے فنکار صرف آسام کے نہیں بلکہ پورے ملک کے ثقافتی ورثے کا حصہ ہیں۔ ان کی اچانک موت نے ہر طبقے کے لوگوں کو صدمے میں ڈال دیا ہے لیکن حکومت اس معاملے کو سنجیدگی سے لینے کے بجائے خاموش تماشائی بنی ہوئی ہے۔

یاد رہے کہ معروف گلوکار زوبین گرگ کی موت 19 ستمبر کو سنگاپور میں پیش آئی تھی، جہاں وہ مبینہ طور پر سمندر میں تیرنے کے دوران ڈوب گئے تھے۔ آسام حکومت نے معاملے کی تحقیق کے لیے ایس آئی ٹی تشکیل دی تھی مگر اب تک نہ کوئی واضح رپورٹ سامنے آئی ہے اور نہ ہی کسی ٹھوس نتیجے کا اعلان کیا گیا ہے۔

گورو گوگوئی نے حکومت سے مطالبہ کیا کہ وہ تحقیقات میں شفافیت لائے، سچائی عوام کے سامنے رکھے اور زوبین گرگ کے اہل خانہ کو انصاف دلانے کے لیے سنجیدہ اقدامات کرے۔ ان کے مطابق، ’’یہ صرف ایک فنکار کی موت نہیں، بلکہ آسام کے وقار اور عوام کے اعتماد کا سوال ہے۔‘‘