تحفے اور شادی کا فریب! خاتون سے 4.5 لاکھ کی ٹھگی، دو خواتین گرفتار

مظفر نگر: اتر پردیش کے مظفر نگر میں پولیس نے دو خواتین کو گرفتار کیا ہے جو سائبر ٹھگی کے ایک بڑے نیٹ ورک کا حصہ تھیں۔ ان کے قبضے سے 43 ہزار روپے نقد، دو پاس بکس اور 19 ڈیبٹ کارڈ برآمد ہوئے ہیں۔

پولیس کے مطابق، یہ دونوں خواتین ایک سائبر ٹھگی میں ملوث تھیں، جس میں ایک خاتون سے ساڑھے چار لاکھ روپے ہتھیا لیے گئے۔ شاہ پور تھانہ علاقے میں 25 فروری کو درج رپورٹ کے مطابق، ایک شخص نے متاثرہ خاتون کی بیٹی کو انسٹاگرام پر شادی کا جھانسہ دیا اور قیمتی تحائف بھیجنے کا دعویٰ کیا۔

بعد میں کسٹم ڈیوٹی کے نام پر پیسے مانگے گئے، پھر کہا کہ اسے سی بی آئی نے گرفتار کر لیا ہے اور رہائی کے لیے مزید رقم درکار ہے۔ اس طرح مجموعی طور پر 4.5 لاکھ روپے وصول کر لیے گئے۔

تحقیقات کے دوران پولیس کو معلوم ہوا کہ یہ رقم دو خواتین، شاہین اور بسو، کے بینک کھاتوں میں منتقل کی گئی جو میرٹھ کی رہائشی ہیں۔ یہ خواتین 10 فیصد کمیشن کے عوض اپنے بینک کھاتوں میں رقم وصول کرتیں اور پھر اے ٹی ایم سے نکال کر اصل ملزمان کے کھاتوں میں بھیج دیتی تھیں۔ ان کے نام پر 17 بینک اکاؤنٹس تھے جو سائبر دھوکہ دہی میں استعمال کیے جا رہے تھے۔

پولیس نے مزید انکشاف کیا کہ اصل ملزمان کے 33 بینک کھاتوں کا سراغ لگایا گیا ہے، جن میں پچھلے چار ماہ میں تقریباً 6.44 کروڑ روپے کا لین دین ہوا۔ پولیس نے ان میں سے 12.78 لاکھ روپے منجمد کر دیے ہیں، جس میں سے متاثرہ خاتون کو اس کی رقم واپس دلائی جائے گی۔ کلیدی ملزمان کے خلاف مقدمہ درج کر لیا گیا ہے اور پولیس ان کے نیٹ ورک کا پتہ لگا رہی ہے۔