سری نگر کے پارمپورہ میں نامعلوم اسلحہ برداروں کے ہاتھوں دکاندار ہلاک

سری نگر: جموں کشمیر کے گرمائی دارالحکومت سری نگر کے مضافاتی علاقہ پارمپورہ میں گزشتہ رات نامعلوم اسلحہ برداروں نے ایک دکاندار کو گولی مار کر ہلاک کردیا۔ مہلوک دکاندار کی شناخت غلام محمد کے طور پر ہوئی ہے۔

نامعلوم اسلحہ برداروں کے ہاتھوں ہلاکت کے اس واقعہ کے بعد پورے ضلع سری نگر میں سیکورٹی فورسز کو الرٹ کیا گیا ہے۔ سیکورٹی فورسز نے شہر کی تمام سڑکوں بالخصوص اضلاع کو سری نگر کے ساتھ جوڑنے والی سڑکوں پر رکاوٹیں کھڑی ہیں جہاں دو پہیہ اور سہ پہیہ گاڑیوں کی تلاشی لی جارہی ہے۔

ذرائع نے بتایا کہ موٹر سائیکل پر سوار تین افراد نے گزشتہ رات دیر گئے غلام محمد پر اس وقت گولیاں چلائیں جب وہ اپنی دکان بند کررہے تھے۔ انہوں نے کہا کہ حملہ آور تاریکی کا فائدہ اٹھاتے ہوئے فرار ہونے میں کامیاب ہوگئے۔ سرکاری ذرائع نے بتایا کہ واقعہ کی نسبت کیس درج کرکے تحقیقات شروع کی گئی ہیں۔ انہوں نے کہا کہ شہر میں اس طرح کے مزید حملوں کو روکنے کے لئے سیکورٹی فورسز کو الرٹ کیا گیا ہے۔

قبل ازیں نامعلوم اسلحہ برداروں نے 26 اگست کو جنوبی کشمیر کے ضلع پلوامہ کے ترال میں دو افراد کو اغوا کے بعد ہلاک کیا۔ مہلوک افراد کی لاشیں ترال کے جنگلی علاقہ سے برآمد ہوئی تھیں۔ مہلوکین کی شناخت عبدالقدیر کوہلی ساکنہ راجوری اور منظور احمد ساکنہ کھنمو سری نگر کے طور پر ہوئی تھی۔

دریں اثنا وادی میں جمعہ کو مسلسل 26 ویں دن بھی ہڑتال رہی۔ وادی بھر میں فون و انٹرنیٹ خدمات کی معطلی جاری رکھی گئی ہے۔ سرکاری دفاتر، بنکوں اور ڈاک خانوں میں معمول کا کام کاج بری طرح سے متاثر ہے۔ تعلیمی اداروں میں درس وتدریس کی سرگرمیاں معطل ہیں۔ وادی میں ریل خدمات بھی گزشتہ زائد از تین ہفتوں سے معطل ہے۔

وادی میں معمول کی زندگی 5 اگست کو اس وقت معطل ہوئی جب مرکزی حکومت نے ریاست کو خصوصی پوزیشن عطا کرنے والی آئین ہند کی دفعہ 370 ہٹادی اور ریاست کو دو حصوں میں تقسیم کرکے مرکز کے زیر انتظام والے علاقے بنانے کا اعلان کردیا۔