بہار میں بزرگ پنشن کے 2 لاکھ سے زائد مستفیدین کے انتقال کا انکشاف، حکومت کا رقم کی وصولی کا حکم

بہار حکومت نے سماجی بہبود کی مختلف اسکیموں کے جائزہ اجلاس میں یہ سنسنی خیز انکشاف کیا کہ بزرگ پنشن اسکیم کے دو لاکھ سے زیادہ مستفیدین کا انتقال ہوچکا ہے لیکن ان کے نام پر پنشن کی رقم مسلسل منتقل ہوتی رہی۔ اس صورتحال کے سامنے آنے کے بعد حکومت نے سخت ہدایات جاری کرتے ہوئے تمام ضلع افسران کو حکم دیا ہے کہ وہ مستفیدین کی جسمانی تصدیق فوری طور پر مکمل کریں اور جن مردہ افراد کے کھاتوں میں پنشن کی رقم گئی ہے، اس کی ایس او پی کے مطابق ریکوری یقینی بنائیں۔

محکمہ سماجی بہبود کی سکریٹری بندنا پریشی نے میٹنگ کی صدارت کی اور تمام اضلاع کے سوشل سیکورٹی سیل کے اسسٹنٹ ڈائریکٹروں کو ہدایت دی کہ شفافیت کو اولین ترجیح بناتے ہوئے مستفیدین کی تصدیق میں کسی طرح کی لاپرواہی نہ برتی جائے۔ انہوں نے کہا کہ جہاں بھی غلط پنشن کی منتقلی سامنے آئے، اسے فوراً روکا جائے اور ضروری کارروائی عمل میں لائی جائے۔ ساتھ ہی زیر التواء درخواستوں کو بھی جلد نمٹانے کی ہدایت دی گئی تاکہ مستحقین تک فائدہ وقت پر پہنچ سکے۔

اجلاس میں یہ بات بھی سامنے آئی کہ اندرا گاندھی نیشنل اولڈ ایج پنشن اسکیم کے دو لاکھ سے زائد فائدہ اٹھانے والوں کی موت ہوچکی ہے، لیکن ان کے ریکارڈ اپ ڈیٹ نہ ہونے کی وجہ سے انہیں زندہ شمار کرکے رقم بھیجی جاتی رہی۔ اس معاملے نے حکومت کو فلاحی اسکیموں میں اپ ڈیٹ سسٹم کی خامیوں کی طرف متوجہ کیا ہے۔

بہار حکومت نے بیان جاری کرتے ہوئے کہا کہ اب بزرگ، بیوہ اور معذوری پنشن کی جسمانی تصدیق کامن سروس سینٹرز (سی ایس سی) کے ذریعے کرائی جائے گی۔ اس مقصد کے لیے ریاست بھر میں 80 ہزار اہلکار تعینات کیے جائیں گے تاکہ ہر مستفید تک آسانی سے رسائی ہوسکے۔ حکومت نے واضح کیا ہے کہ زندگی کی توثیق کا یہ عمل مفت ہوگا۔

سی ایس سی مراکز کو ہدایت دی گئی ہے کہ وہ فنگر پرنٹ، آئرس اسکین اور چہرے کی شناخت کے نظام کی دستیابی یقینی بنائیں تاکہ بائیومیٹرک مسائل کے باوجود کوئی مستحق پنشن سے محروم نہ رہ جائے۔ حکومت کا کہنا ہے کہ کئی بزرگ افراد کے فنگر پرنٹ یا بائیومیٹرک کمزور ہونے کی وجہ سے توثیق میں مشکلات پیش آتی ہیں، اس لیے متبادل طریقے ضروری ہیں۔

جسمانی تصدیق کی یہ خصوصی مہم یکم دسمبر 2025 سے ریاست بھر میں شروع ہوگی۔ اجلاس میں دیگر سماجی تحفظ کی اسکیموں جیسے بیوہ پنشن، معذوری پنشن، موت کا معاوضہ اور شادی گرانٹ کی پیشرفت کا بھی تفصیلی جائزہ لیا گیا۔ حکومت نے تمام افسران پر زور دیا کہ یہ تمام فائدے شفافیت، جوابدہی اور وقت کی پابندی کے ساتھ حقیقی مستحقین تک پہنچائے جائیں۔