ایس سی او سمٹ میں ایک ساتھ نظر آئے مودی، پوتن اور جن پنگ، مسکراتے ہوئے ایک دوسرے سے ملائے ہاتھ

چین کے تیانجن شہر میں شنگھائی تعاون تنظیم (ایس سی او) سمٹ جاری ہے۔ اس درمیان پیر کو ایک بڑی تصویر دیکھنے کو ملی جب وزیر اعظم نریندر مودی، روسی صدر ولادیمیر پوتن اور چینی صدر شی جن پنگ ایک ساتھ نظر آئے۔ تینوں رہنماؤں نے ایس سی او منچ پر آگے بڑھ کر، مسکراتے ہوئے ایک دوسرے سے ہاتھ ملائے۔ تھوڑی دیر تک تینوں رہنما مسکراتے رہے اور ایک دوسرے کی بات سنتے رہے۔ موجودہ پس منظر میں تینوں رہنما کی ملاقات کافی اہم مانی جا رہی ہے۔

وزیر اعظم نریندر مودی نے اس ملاقات کی تصویر سوشل میڈیا پلیٹ فارم پر شیئر کی ہے۔ انہوں نے لکھا، ’’تیانجن میں بات چیت جاری! ایس سی او چوٹی کانفرنس کے دوران صدر پوتن اور صدر شی جن پنگ کے ساتھ خیالات کا تبادلہ۔‘‘

واضح رہے کہ ہندوستان سمیت دنیا بھر کے ملکوں پر ٹرمپ کے ذریعہ عائد بھاری ٹیرف کے درمیان اب سب کی نگاہیں ایس سی او چوٹی کانفرنس اور اس کے بڑے رہنماؤں کی میٹنگ پر ہے۔ لوگ اس بات کا انتظار کر رہے ہیں کہ ایس سی او کے ملک کیا حکمت عملی بناتے ہیں۔

ایس سی او چوٹی کانفرنس کی شروعات کے ساتھ چینی صرر شی جن پنگ نے بڑا اعلان کیا ہے۔ چینی صدر نے اس سال شنگھائی کو آپریشن آرگنائزیشن (ایس سی او) کے اراکین ملکوں کو 281 ملین امریکی ڈالر گرانٹ دینے کا اعلان کیا۔ مانا جا رہا ہے کہ یہ مدد اراکین ملکوں کی اقتصادی اور ترقی سے متعلق ضروریات پوری کرنے کے لیے ہے۔

25ویں ایس سی او چوٹی کانفرنس کی رسمی شروعات اتوار کی رات شی جن پنگ کے ذریعہ دی گئی ایک شاندار دعوت سے ہوئی۔ اس میں وزیر اعظم نریندر مودی اور روس کے صدر ولادیمیر پوتن اور دیگر رہنما بھی شامل ہوئے۔ اس دوران وزیر اعظم مودی نے تنظیم کے دیگر رہنماؤں کے ساتھ مل کر اس گروپ کی مستقبل کی سمت طے کرنے کے لیے یک روزہ چوٹی کانفرنس میں بات چیت شروع کی۔

اس سال کی کانفرنس ایس سی او گروپ کی سب سے بڑی چوٹی کانفرنس بتائی گئی ہے۔ کیونکہ اس سال ایس سی او کے صدر چین نے ایس سی او پلس چوٹی کانفرنس میں حصہ لینے کے لیے اقوام متحدہ کے سکریٹری جنرل اینتونیو گویترس سمیت 20 غیر ملکی رہنماؤں اور 10 بین الاقوامی تنظیموں کے سربراہوں کو مدعو کیا ہے۔ پیر کو مختلف رہنما میٹنگ کو خطاب کرنے والے ہیں اور تنظیم کے لیے اپنے مستقبل کے نظریہ کو پیش کریں گے۔