’پارلیمنٹ میں بھی اراکین پارلیمنٹ کو نہیں مل رہی چائے‘، رکن پارلیمنٹ محمد جاوید نے حکومت کی کھولی قلعی

مشرق وسطیٰ میں جنگ سے پیدا حالات نے ہندوستان میں ایل پی جی کی شدید قلت پیدا کر دی ہے۔ حکومت بھلے ہی ایل پی جی سلنڈر بحران سے انکار کر رہی ہے، لیکن مختلف ریاستوں سے جو تصویریں اور ویڈیوز سامنے آ رہی ہیں وہ فکر انگیز ہیں۔ کانگریس رکن پارلیمنٹ محمد جاوید نے بھی حکومت کے دعووں کو غلط ٹھہراتے ہوئے ایک ایسا بیان دیا ہے، جو حکمراں طبقہ کے بیانات کی قلعی کھولنے والی ہے۔

محمد جاوید نے الزام عائد کیا ہے کہ اراکین پارلیمنٹ کو پارلیمنٹ میں چائے تک نہیں مل پا رہی ہے، پھر حکومت یہ دعویٰ کیسے کر سکتی ہے کہ ایل پی جی سلنڈر کی قلت نہیں ہے۔ انھوں نے یہ بھی کہا کہ لوگوں کو ’کالابازاری‘ کے سبب بڑھی ہوئی قیمتیں دے کر ایل پی جی سلنڈر 1500 روپے سے 2000 روپے تک میں دینے پڑ رہے ہیں۔ ایل پی جی بحران کی حالت تو کچھ ایسی ہے کہ اس کی آنچ پارلیمنٹ تک پہنچ گئی ہے۔

کانگریس رکن پارلیمنٹ محمد جاوید کا کہنا ہے کہ ’’اس میں کوئی شبہ نہیں ہے کہ (ایل پی جی سلنڈر) کی کمی ہے۔ میں روزہ رکھ رہا ہوں، لیکن کل پارلیمنٹ میں بحث کا موضوع یہ تھا کہ جب اراکین پارلیمنٹ نے پارلیمنٹ کینٹین میں چائے یا کافی مانگی، تو انھیں بتایا گیا کہ یہ دستیاب نہیں ہے۔ پھر بھی آپ (حکومت) دعویٰ کرتے ہیں کہ گھبرانے کی کوئی ضرورت نہیں ہے۔‘‘ انھوں نے مزید کہا کہ کالابازاری کی خبریں آ رہی ہیں، لوگوں کو زیادہ قیمتوں پر بلیک میں سلنڈر خریداری کرنی پڑ رہی ہے۔ ان خبروں کو کسی بھی طرح نظر انداز نہیں کیا جا سکتا۔ محمد جاوید نے موجودہ حالات پر تشویش کا اظہار کرتے ہوئے کہا کہ حکومت بھلے ہی کہہ رہی ہے کہ گھبرانے کی ضرورت نہیں ہے، لیکن زمینی حقیقت بہت الگ ہے۔