لداخ تعطل: ہند۔ چین کے سینئر فوجی عہدیداروں کی میٹنگ آج

مشرقی لداخ سیکٹر میں حقیقی کنٹرول لائن پر گزشتہ ایک ماہ سے جاری تعطل کو دور کرنے کے لئے ہند اور چین کے سینئر فوجی افسران کے درمیان آج پہلی اعلی سطح میٹنگ ہوگی۔

حقیقی کنٹرول لائن پر خاص طور پر تین جگہوں پر دونوں فوجوں کے مابین تعطل ہے اور گزشتہ ایک مہینے سے دونوں نے وہاں اچھی خاصی تعداد میں فوج جمع کررکھی ہے۔

لیفٹننٹ جنرل سطح کے افسران کی یہ میٹنگ چین کے چوشول مولڈو واقع بارڈر پرسنل میٹنگ پوائنٹ پر ہوگی، جو اس طرح کی میٹنگوں کے لئے لداخ میں مقرر دو مراکز میں سے ایک ہے۔ میٹنگ میں ہندوستان کی قیادت لیہ واقع 14 ویں کور کے کمانڈر لیفٹننٹ جنرل ہریندر سنگھ کریں گے جبکہ چین کی جانب سے ان کے ہم منصب فوجی افسر بات چیت کی میز پر ہوں گے۔

منگل کو فوج کی 3 ڈویژن کے سربراہ جو میجر جنرل رینک کے افسر ہیں، انہوں نے اپنے چینی ہم منصب کے ساتھ اس معاملے پر بات چیت کی تھی لیکن یہ بات چیت بے نتیجہ رہی۔ اس کے بعد جمعہ کو اعلی سطح میٹنگ کا فیصلہ کیا گیا۔ اس کے علاوہ بھی دونوں فریقین کے درمیان مختلف سطح کے افسران کی تقریباً 8 میٹنگیں ہوچکی ہیں۔

ادھر کل ہندوستان اور چین کے درمیان لداخ میں حقیقی کنٹرول لائن پر پیدا شدہ فوجی تعطل کے درمیان دونوں ممالک کی وزارت خارجہ میں جوائنٹ سکریٹری سطح کی بات چیت ہوئی جس میں چین کی جانب سے صورتحال کو معمول پر لانے کے لئے مثبت اشارے دیئے گئے۔

وزارت خارجہ میں جوائنٹ سکریٹری (مشرقی ایشیا) پیوش شریواستو اور چینی وزارت خارجہ کے ڈائریکٹر جنرل کوو چیانگاؤ کے مابین ویڈیو کانفرنسنگ کے ذریعہ بات چیت کے بعد آج رات جاری ایک بیان میں کہا گیا کہ ہندوستان اور چین کے درمیان پرامن، مستحکم اور متوازن تعلقات موجودہ عالمی حالات میں استحکام کے لئے اہم ہیں۔ یہ بات چیت لداخ میں سنیچر کو ہندوستان اور چین کی فوجوں کے مابین لیفٹننٹ جنرل سطح کی میٹنگ سے قبل کی شام ہوئی۔

وزارت خارجہ نے آج رات یہاں یہ اطلاع دی۔ ویڈیو کانفرنسنگ میں دونوں فریقوں نے ہندوستان اور چین کے دو فریقی تعلقات کی تازہ صورتحال اور سرگرمیوں کا جائزہ لیا۔ اس سلسلے میں انہوں نے وزیراعظم نریندر مودی اور چینی صدر شی جن پنگ کے ذریعہ ظاہر اس اتفاق کو یاد کیا کہ ہندوستان اور چین کے درمیان امن و استحکام اور متوازن تعلقات موجودہ عالمی حالات میں استحکام کے لئے ایک مثبت عنصر ہے۔