خواتین صحافیوں پر پابندی: ہندوستانی وزارتِ خارجہ کا ردِعمل، افغان وزیر کی پریس کانفرنس سے لاتعلقی ظاہر

افغانستان کی طالبان حکومت کے وزیرِ خارجہ امیر خان متقی کے ہندوستانی دورے کے دوران اس وقت تنازعہ کھڑا ہو گیا جب دہلی میں جمعہ کے روز ان کی پریس کانفرنس میں خواتین صحافیوں کو داخلے کی اجازت نہیں دی گئی۔ اس فیصلے پر صحافتی برادری اور سماجی حلقوں نے سخت ردِعمل ظاہر کیا اور اسے خواتین کے خلاف امتیازی رویہ قرار دیا۔

اس واقعے پر مختلف میڈیا اداروں کی خواتین رپورٹرز نے سوشل میڈیا پر اپنے تجربات بیان کرتے ہوئے بتایا کہ وہ پریس کانفرنس کے مقام پر پہنچی تھیں مگر انہیں اندر جانے سے روک دیا گیا۔ کئی صارفین نے کہا کہ تمام خواتین صحافی ڈریس کوڈ کا احترام کر رہی تھیں، اس کے باوجود انہیں شرکت کی اجازت نہیں دی گئی۔

شدید تنقید کے بعد ہندوستان کی وزارتِ خارجہ (ایم ای اے) نے اپنا مؤقف واضح کرتے ہوئے کہا کہ افغان وزیرِ خارجہ کی پریس کانفرنس میں خواتین صحافیوں کو نہ بلانے کے فیصلے میں وزارت کا کوئی کردار نہیں تھا۔ وزارت نے بیان میں کہا کہ یہ فیصلہ صرف اور صرف پریس کانفرنس کے منتظمین نے کیا تھا اور ایم ای اے کی کوئی مداخلت نہیں تھی۔

وزارتِ خارجہ کا یہ بیان اس وقت سامنے آیا جب سوشل میڈیا پر اور سیاسی حلقوں میں سوالات اٹھنے لگے کہ ہندوستان میں ایسی امتیازی کارروائی کیسے ممکن ہوئی۔ کانگریس رہنماؤں پی چدمبرم اور پرینکا گاندھی نے اس معاملے پر مودی حکومت کو سخت تنقید کا نشانہ بنایا۔ پرینکا گاندھی نے وزیراعظم نریندر مودی سے براہ راست وضاحت طلب کرتے ہوئے کہا کہ خواتین صحافیوں کے ساتھ اس طرح کا رویہ ناقابلِ قبول ہے۔

واضح رہے کہ امیر خان متقی جمعرات کو 7 روزہ دورے پر ہندوستان پہنچے تھے۔ اپنے قیام کے دوسرے دن انہوں نے ہندوستانی وزیرِ خارجہ ایس۔ جے شنکر سے ملاقات کی۔ دونوں رہنماؤں نے دوطرفہ تجارت، انسانی امداد اور سیکورٹی تعاون جیسے اہم امور پر تفصیلی تبادلۂ خیال کیا۔

ملاقات کے بعد میڈیا بریفنگ میں امیر خان متقی نے کہا کہ افغانستان کی سرزمین کسی بھی ملک کے خلاف استعمال نہیں ہونے دی جائے گی۔ ساتھ ہی انہوں نے یہ بھی اعلان کیا کہ کابل جلد اپنے سفارت کاروں کو نئی دہلی بھیجے گا تاکہ دوطرفہ تعلقات کو بحال کرنے کے عمل کو آگے بڑھایا جا سکے۔ ان کے مطابق ہندوستانی وزیرِ خارجہ نے افغان حکومت کو اپنے سفارت کار بھیجنے کی اجازت دی ہے، اور اب کابل میں ان اہلکاروں کے انتخاب کا عمل شروع کیا جائے گا۔

اگرچہ متقی کا یہ دورہ دونوں ممالک کے درمیان برف پگھلنے کا اشارہ سمجھا جا رہا تھا لیکن خواتین صحافیوں پر پابندی کا واقعہ اس دورے پر ایک منفی سایہ ڈال گیا ہے۔ صحافتی حلقوں کا کہنا ہے کہ ہندوستان جیسے جمہوری ملک میں اس طرح کا امتیازی واقعہ ناقابلِ برداشت ہے اور اس پر واضح وضاحت ناگزیر ہے۔