دھن تیرس اور دیوالی کے سبب زبردست ٹریفک جام، یمنا-آگرہ ایکسپریس وے سے لے کر دہلی-این سی آر تک رینگ رہیں گاڑیاں

راجدھانی دہلی سمیت ملک کی دیگر ریاستوں میں دھن تیرس اور دیگر تہواروں کی کافی دھوم دیکھی جا رہی ہے۔ بازاروں میں لوگوں کی زبردست بھیڑ نظر آ رہی ہے۔ آگرہ-یمنا ایکپریس وے کے ٹول پلازہ پر کئی کلومیٹر تک جام لگ گیا ہے، جس کی وجہ سے لوگوں کو کافی پریشانیوں کا سامنا کرنا پڑ رہا ہے۔ بھیڑ کی وجہ سے ٹرینوں کا بھی برا حال ہے۔ جنرل ڈبوں میں بھیڑ کی وجہ سے لوگوں کو باتھ روم تک میں سفر کرنا پڑ رہا ہے۔ یہی نہیں اے سی کوچ میں بھی چڑھنے کے بعد اپنی سیٹ تک پہنچنے میں لوگوں کو کافی پریشانیوں کا سامنا کرنا پڑ رہا ہے۔

واضح رہے کہ ٹرینوں اور سڑکوں پر بھیڑ کی اصل وجہ یہ ہے کہ اس بار دیوالی پیر کو پڑ رہی ہے، اور ہفتہ و اتوار کے روز بھی ہفتہ واری چھٹی ہے۔ یہی وجہ ہے کہ دہلی-این سی آر میں رہ کر ملازمت کرنے والے لوگ اپنے گھروں کے لیے جمعہ کی رات اور ہفتہ کی صبح نکلے ہیں۔ ہندی نیوز پورٹل ’آج تک‘ پر شائع خبر کے مطابق دہلی کے مشہور لاجپت نگر سنٹرل مارکیٹ میں بھی ہفتہ کی صبح سے لوگوں کی بھاری بھیڑ نظر آ رہی ہے۔ بڑی تعداد میں لوگ مارکیٹ پہنچ رہے ہیں اور خریداری کر رہے ہیں۔ اس دوران بھیڑ کو کنٹرول کرنے کے تمام انتظام کر لیے گئے ہیں، پولیس ٹیم کی تعیناتی کے ساتھ ہی مسلسل سی سی ٹی وی کیمرے سے نگرانی رکھی جا رہی ہے۔ ساتھ ہی مسلسل اناؤنسمنٹ کے ذریعہ لوگوں کو سیکورٹی سے متعلق ہدایات بھی دی جا رہی ہیں۔

دہلی کے کالکاجی علاقے میں کالاکاجی مندر سے نہرو پلیس/چراغ دہلی اور مودی مِل کی طرف جانے والی سڑک پر ہفتہ کی صبح سے ہی زبردست جام ہے۔ بھیڑ کا عالم یہ ہے کہ یہاں گاڑیاں رینگ رہی ہیں، حالانکہ جمعہ کی شام کو بھی یہاں زبردست ٹریفک جام تھا۔ یہی وجہ ہے کہ کالکاجی مندر سے چراغ دہلی/ایئرپورٹ کی طرف جانے والے لوگوں کو کافی مشکلات کا سامنا کرنا پڑ رہا ہے۔ دہلی این سی آر کے علاوہ مہاراشٹر سے بھی ایک تصویر سامنے آئی ہے۔ یہ تصویر کراڈ کے پونے-بنگلورو نیشنل قومی شاہراہ کا بتایا جا رہا ہے۔ زبردست ٹریفک جام لگا ہوا ہے، لوگوں کو 2 کلومیٹر کا سفر طے کرنے میں کئی گھنٹے لگ جا رہے ہیں۔

دوسری جانب تہواروں کے سبب ریلوے اسٹیشنوں پر بھاری بھیڑ دیکھنے کو مل رہی ہے۔ نئی دہلی ریلوے اسٹیشن اور آنند وہار ریلوے اسٹیشن پر اپنے شہر کے لیے ٹرین پکڑنے کے لیے بڑی تعداد میں لوگ پہنچ رہے ہیں، جس کے سبب پلیٹ فارم پر بھاری بھیڑ دیکھنے کو مل رہی ہے۔ حالانکہ بھیڑ کو کنٹرول کرنے کے لیے بڑی تعداد میں پولیس کی تعیناتی کی گئی ہے۔ ساتھ ہی پلیٹ فارم پر رسی بھی لگائی گئی ہے، تاکہ ٹرین آنے پر بھیڑ اچانک ٹرین میں نہ داخل ہو جائے۔ اس کے علاوہ پلیٹ فارم پر اناؤنس بھی کیا جا رہا ہے اور لوگوں کو گائیڈ بھی کیا جا رہا ہے۔

لکھنؤ ریلوے اسٹیشن پر بھی لوگوں کی بھاری بھیڑ امڈ رہی ہے۔ بھیڑ کا عالم یہ ہے کہ لوگ ٹرین میں بھی نہیں چڑھ پا رہے ہیں، جس کے سبب لوگوں کی ٹرینیں چھوٹ جا رہی ہیں۔ لکھنؤ سے بہار کے مختلف شہروں مں جانے والی ٹرینوں میں بھی مسافروں کی بھیڑ دیکھنے کو مل رہی ہے۔ بھیڑ کے سبب لوگ ٹوائلٹ میں سفر کرنے کو مجبور ہیں۔