بدلاپور کے ایم آئی ڈی سی کی پیسیفک کیمیکل کمپنی میں زبردست دھماکہ، 3 کلومیٹر تک دیکھے گئے آگ شعلے

مہاراشٹر کے تھانے ضلع کے بدلاپورایسٹ کے ایم آئی ڈی سی علاقے میں واقع پیسیفک کیمیکل کمپنی میں بدھ کی دیر رات زوردار دھماکے کے بعد آگ لگنے سےعلاقے میں کہرام مچ گیا۔ دھماکہ اتنا شدید تھا کہ آگ کے شعلے 2 سے 3 کلومیٹردورتک دیکھے جا سکتے تھے۔ واقعے کی اطلاع ملتے ہی فائربریگیڈ کی 4 گاڑیاں جائے وقوعہ پر پہنچیں اورکئی گھنٹے کی مشقت کے بعد آگ پرقابو پالیا۔ ابھی تک کسی جانی نقصان کی اطلاع نہیں ہے۔ بدلاپور تھانے کی ٹیم اس واقعہ کی تحقیقات کر رہی ہے۔

ابتدائی معلومات کے مطابق یہ بھیانک واردات کھروائی ایم آئی ڈی سی واقع پیسیفک کیمیکل کمپنی میں ہوئی۔ مقامی رہائشیوں سے موصول ہونے والی معلومات کے مطابق آدھے گھنٹے سے15منٹ کے عرصے میں تقریباً 8 سے 10 دھماکے ہوئے۔ دھماکوں کی آوازیں 3 کلومیٹردور تک سنی گئیں۔ اس واردات کے سبب زمین لرزنے کی وجہ سے مقامی لوگ دہشت میں آگئےاورپولیس نیز فائر ڈیپارٹمنٹ کو فوری طور پر اطلاع دی گئی۔

خبر ملتے ہی بدلاپور فائر ڈپارٹمنٹ کی 4 فائر گاڑیاں کچھ ہی دیرمیں جائے وقوعہ پر پہنچ گئیں اورآگ پر قابو پایا۔ فائر اہلکاروں نے کمپنی کے اندرسرچ آپریشن بھی کیا۔ خوش قسمتی سے اس حادثے میں کسی جانی نقصان کی کوئی اطلاع نہیں ہے۔ دھماکہ دیررات ہوا جب فیکٹری میں مزدوراورعملہ موجود نہیں تھا۔ فی الحال دھماکے کی وجوہات جاننے کی کوششیں جاری ہیں۔

وہیں دوری طرف ملحقہ شہرممبئی کے اندھیری علاقے میں بھیانک آتشزدگی سے دو لوگوں کے ہلاک ہونے کی اطلاع ہے۔ بتایا جا رہا ہے کہ اندھیری ایسٹ کے چاندیولی علاقے میں ایک تجارتی عمارت میں آگ لگنے سے دو لوگوں کی موت ہو گئی ہے۔ یہ واردات ٹیکس سینٹر، نارائن پلازہ بلڈنگ کی تیسری منزل پر واقع دفتر میں ہوئی۔ آگ لگنے سے عمارت میں دھواں بھر گیا۔ فائر ڈپارٹمنٹ نے آگ کو لیول 1 قرار دے کر قابو کیا۔ آفس سے دو افراد کو بے ہوش حالت میں نکالاگیا جنہیں اسپتال لے جایا گیا لیکن ڈاٹکٹروں نے انہیں مردہ قرار دے دیا۔