ممبئی کے قبرستان میں کالے جادو کے آثار ملنے سے علاقہ میں غم و غصے کی لہر، سخت کارروائی کا مطالبہ

ممبئی کے جنوب وسطی میں واقع وڈالا انٹاپ ہل مسلم قبرستان میں بعد نماز جمعہ ایک شخص کو دوپہر تین بجے ایک قبر کے قریب کھدائی کرتےاور مشتبہ حرکت کرتے ہوئے دیکھ کر گورکن نے شور مچادیا اور قبرستان میں فاتحہ پڑھنے کے لیے آنے والوں نے یاسین نامی ادھیڑ عمر شخص کو پکڑلیا۔

یاسین نامی یہ شخص مسجد سے متصل ایک قبر کے قریب کھدائی کرکے ایک گڑیا اور کچھ عجیب وغریب شئے گاڑرہاتھا۔مشتبہ شخص سے اس سامان کو چھین لیاگیااور پولیس نے اسے حراست میں لے لیا۔

ایک شخص ساجد شبیر نے کہاکہ شور سن کر اس شخص کو پکڑاگیاجوکہ پلاسٹک کی گڑیا اور مشتبہ اشیاء دفنانے کی کوشش کرہاتھا۔قبرستان کمیٹی کے سنئیرممبر اشتیاق شیخ نے کہاکہ اس طرح کے کالے جادو کے عمل کرتے ہوئے لوگ اکثر پکڑے جاتے ہیں اور انہیں پولیس کے حوالے کردیا جاتاہے۔

اشتیاق شیخ نے  مسلم معاشرے میں کالے جادو میں مسلمانوں کے ملوث ہونے پر گہری تشویش ظاہر کی۔ بتایاجاتاہے کہ مذکورہ شخص نے پولیس کو بتایاکہ اُس کےبیٹے کے شدید علیل رہنے کی وجہ سے اسے یہ کرنے پر مجبور کیا،پولیس نے تفتیش کے بعد اس کے خلاف شکایت درج کرلی اور اُسے گھر جانے کی اجازت دے دی ہے ۔