انتخابات سے پہلے ہی کیوں ہوا پلوامہ میں حملہ، ممتا بنرجی کا سوال

مغربی بنگال کی وزیر اعلیٰ اور ترنمول کانگریس سربراہ ممتا بنرجی نے پلوامہ حملے کے وقت کو لے کر سوال اٹھایا ہے۔ انھوں نے کہا کہ آخر عین انتخابات کے قریب ہی یہ دہشت گردانہ حملہ کیوں ہوا؟ ممتا بنرجی نے پیر کے روز کہا کہ خفیہ رپورٹ ہونے کے بعد بھی سی آر پی ایف کے اتنے بڑے قافلے کو ایک ساتھ کیوں بھیجا گیا؟ ممتا بنرجی نے سوال یہ بھی اٹھایا کہ جوانوں کو ائیر لفٹ کیوں نہیں کیا گیا؟ اس میں کتنا پیسہ خرچ ہو جاتا؟۔

ممتا بنرجی نے مرکزی حکومت کو تنقید کا نشانہ بناتے ہوئے کہا کہ ان لوگوں کے خلاف کارروائی ہونی چاہیے جنھوں نے اس حملے کو انجام دیا ہے، لیکن اگر اس موقع پر بی جے پی-آر ایس ایس نے فساد پھیلانے کی کوشش کی ہے تو انھیں ملک معاف نہیں کرے گا۔ انھوں نے اس موقع پر الزام عائد کیا کہ ان کا فون ٹیپ کیا جا رہا ہے اور اس کی خبر سب کو ہے۔ ممتا نے کہا کہ ’’آپ سب جانتے ہیں کہ مجھے بھی انٹلیجنس رپورٹ ملتی ہے کہ میرا فون ٹیپ ہو رہا ہے۔‘‘

قابل ذکر ہے کہ گزشتہ جمعرات کو جموں و کشمیر کے پلوامہ میں خود کش حملے میں سی آر پی ایف کے 49 جوانوں کی جان چلی گئی تھی۔ اس حملے کی ذمہ داری پاکستان کی دہشت گرد تنظیم جیش محمد نے لی ہے۔ یہ وہی تنظیم ہے جس نے 2001 میں پارلیمنٹ پر حملہ کیا تھا۔