ممتا بنرجی اور شرد پوار کی ٹیلی فون پر گفتگو، بنگال کے آئندہ اسمبلی انتخابات کے تعلق سے تبادلہ خیال

ممبئی: مغربی بنگال کی وزیر اعلی ممتا بنرجی اور این سی پی کے سربراہ شرد پوار نے کل رات ٹیلی فون پر گفتگو کی اور اگلے چند ماہ میں ویسٹ بنگال میں منعقد ہونے والے اسمبلی انتخابات پر تبادلہ خیال کیا نیز حزب اختلاف کی حکومت والی ریاستوں کو غیر مستحکم کرنے کے لئے بی جے پی کی زیرقیادت مرکزی حکومت کے اختیارات کے ناجائز استعمال کی کوششوں پر تشویش کا اظہار کیا این سی پی کے ترجمان نواب ملک نے یہ باتیں آج اخبار نویسیوں کو بتائیں۔

انہوں نے کہا کہ ممتا بنرجی نے بنگال میں انتخابات سے قبل مرکز کو ان کی حکومت کو نشانہ بنانے کی بات کی، خاص طور پرکولکتہ کے قریب حال ہی میں بی جے پی کے قومی صدر جے پی نڈا کی کار پر حملے کے بعد بنگال کے تین اعلی سینئر پولیس افسران کو مرکزی وزارات داخلہ کی جانب سے دہلی میں طلب کیے جانے کا بھی تذکرہ کیا۔

نواب ملک نے مزید کہا کہ ممتا بنرجی نے اس سنگین معاملے میں شردپوار سے تبادلہ خیال کیا ہے جبکہ شردپوار جلد ہی دہلی میں تمام اپوزیشن کی پارٹیوں کے سربراہان سے ملاقات کرکے انہیں مرکزی حکومت کی اس انانیت وغیرجمہوری طرزعمل کے خلاف متحد کرنے کی کوشش کریں گے۔

این سی پی ترجمان نے مزید بتایا کہ بی جے پی کی مرکزی حکومت اپنے اقتدار کا غلط استعمال کرتے ہوئے ریاستوں کی منتخب حکومت کو غیرمستحکم اور کمزور کرنے کی کوشش کر رہی ہے۔ وہ ریاستی حکومتوں کے اختیارات کو چھیننے کی بھی کوشش کر رہی ہے جو کسی طور مناسب نہیں ہے نیز اس معاملے میں پوار صاحب وممتابنرجی نیز دیگر پارٹیوں کے لیڈران سے بات چیت ہوئی ہے۔ ہمیں یقین ہے کہ پوار صاحب اس پورے معاملے میں کوئی بہتر حکمت عملی تیار کریں گے۔ واضح رہیکہ ممتا بنرجی اپنی سیاسی پارٹی ترنمول کانگریس اور شردپوار راشٹروادی کانگریس پارٹی کے قیام سے قبل کانگریس میں شامل تھے تب سے دونوں کے گہرے مراسم ہیں۔