بنگال میں ایک کروڑ ووٹ کاٹے گئے، گیانیش نے ووٹ ہی نہیں ووٹوں کی گنتی بھی ہائی جیک کی: ممتا بنرجی

نئی دہلی، یکم نومبر۔ ترنمول کانگریس (ٹی ایم سی) کی سربراہ اور مغربی بنگال کی سابق وزیر اعلیٰ ممتا بنرجی نے دہلی کے رام لیلا میدان میں انڈیا اتحاد کی عظیم الشان ریلی سے خطاب کرتے ہوئے چیف الیکشن کمشنر گیانیش کمار اور مرکزی حکومت پر سخت حملہ کیا۔ انہوں نے الزام لگایا کہ مغربی بنگال خصوصی گہری نظرثانی (ایس آئی آر) کے عمل سے متاثر ہوا ہے اور ریاست میں ایک کروڑ سے زیادہ ووٹروں کے نام ووٹر لسٹ سے خارج کر دیے گئے ہیں۔ ممتا نے دعویٰ کیا کہ انتخابی نتائج میں انہیں شکست نہیں ہوئی بلکہ منصوبہ بند طریقے سے ہرایا گیا۔

ممتا بنرجی نے کہا کہ وہ اس لڑائی سے پیچھے نہیں ہٹیں گی اور جمہوریت کے تحفظ کے لیے آخری دم تک جدوجہد کریں گی۔ انہوں نے کہا، ’’ہم پیچھے نہیں ہٹیں گے، ہم لڑیں گے۔ ہم جمہوریت کو بچائیں گے اور اسے دوبارہ قائم کریں گے۔‘‘ انہوں نے کہا کہ اگر مغربی بنگال کو لوٹا گیا ہے تو وہ دہلی کو لوٹنے نہیں آئی ہیں بلکہ جمہوریت کو بچانے اور عوام کے حقوق واپس دلانے کے لیے یہاں پہنچی ہیں۔

ممتا بنرجی نے ایس آئی آر پر طنز کرتے ہوئے اس کی نئی تشریح بھی پیش کی۔ انہوں نے کہا کہ ایس آئی آر کا مطلب ’اسپیشل انٹینسیو ریلیف ٹو اے پولیٹیکل پارٹی لائک بی جے پی‘ ہے، یعنی بی جے پی جیسی سیاسی جماعت کو خصوصی مدد فراہم کرنا۔

چیف الیکشن کمشنر گیانیش کمار کو نشانہ بناتے ہوئے ممتا نے انہیں ’وینش کمار‘ (غائب کرنے والا) قرار دیا۔ انہوں نے الزام لگایا کہ گیانیش کمار نے صرف ووٹ غائب نہیں کیے بلکہ مرکزی سطح پر انتخابی عمل کو ہائی جیک کرکے ووٹوں کی پوری گنتی ہی غائب کر دی۔

ممتا بنرجی نے دعویٰ کیا کہ مغربی بنگال میں ایک کروڑ سے زیادہ ووٹروں کے نام نکال دیے گئے۔ انہوں نے کہا، ’’ووٹنگ سے پہلے ہم ہارے نہیں تھے، ہمیں ہرایا گیا۔ اس کا بدلہ ہم سیاست کے ذریعے لیں گے، جمہوریت کے ذریعے لیں گے اور اپنی لڑائی جاری رکھیں گے۔‘‘

انہوں نے الزام لگایا کہ انتخابی عمل کے دوران الیکٹرانک ووٹنگ مشینوں (ای وی ایم) کے ساتھ چھیڑ چھاڑ کی گئی، عوام کے ووٹ اور جمہوری حقوق چھینے گئے اور آئین کو نقصان پہنچایا گیا۔ ان کے مطابق ووٹوں کی گنتی کے عمل کو بھی متاثر کیا گیا۔ ممتا بنرجی نے کہا کہ اپوزیشن جماعتیں جمہوریت کے تحفظ کے لیے متحد ہیں اور کسی بھی دباؤ کے سامنے جھکنے والی نہیں ہیں۔ انہوں نے دوٹوک انداز میں کہا کہ وہ اپنی جدوجہد جاری رکھیں گی اور جمہوری نظام کو بچانے کے لیے ہر ممکن کوشش کریں گی۔

ان کا کہنا تھا کہ ملک میں جمہوریت اور آئین کی بالادستی برقرار رکھنا ضروری ہے اور عوام کے ووٹ کے حق سے کسی کو کھلواڑ کرنے کی اجازت نہیں دی جا سکتی۔