مالیگاؤں بم دھماکہ: خصوصی عدالت کے فیصلے کے خلاف داخل عرضی پر بامبے ہائی کورٹ میں ہوئی سماعت

بامبے ہائی کورٹ نے منگل (16 ستمبر) کو مالیگاؤں 2008 بم دھماکہ متاثرین کے اہل خانہ سے سوال کیا کہ ’’کیا وہ لوگ سادھوی پرگیہ سنگھ ٹھاکر اور لیفٹیننٹ کرنل پرساد پروہت کے خلاف مقدمے میں گواہ تھے؟‘‘ واضح ہو کہ متاثرین کے اہل خانہ نے 31 جولائی کو تمام ملزمین کو بری کیے جانے کے فیصلہ کے خلاف اپیل دائر کی ہے۔ عدالت نے اپیل دائر کرنے والوں سے سوال کیا کہ اگر وہ گواہ نہیں تھے تو کس بنیاد پر اپیل دائر کر رہے ہیں؟

مرکزی حکومت کی جانب سے قومی تحقیقاتی ایجنسی (این آئی اے) اور ریاستی حکومت کی جانب سے انسداد دہشت گردی اسکواڈ (اے ٹی ایس) نے اب تک سادھوی پرگیہ سنگھ ٹھاکر اور لیفٹیننٹ کرنل پرساد پروہت سمیت دیگر 2 کے بری ہونے کو چیلنج کرتے ہوئے کوئی اپیل دائرنہیں کی ہے۔ دونوں ہی ایجنسیوں نے بری کرنے کے فیصلے کو قبول کر لیا ہے۔ حالانکہ متاثرین کے اہل خانہ نے بامبے ہائی کورٹ میں اپیل دائر کر تمام ملزمان کے بری ہونے کے فیصلے کو چیلنج کیا ہے۔ یہ اپیل نثار احمد، حاجی سید بلال اور 5 دیگر لوگوں کے ذریعہ دائر کی گئی ہے، جنہوں نے اس حادثہ میں اپنے رشتہ داروں کو کھو دیا تھا۔

عدالت نے اپیل کنندگان سے کہا کہ ’’اگر آپ کے بیٹے کی موت ہوئی ہے تو یقینی طور پر آپ نے خود تحقیقات کی ہوگی۔ کیا وجہ ہے کہ آپ نے خود تحقیقات نہیں کی؟ آپ کے خود کو پیش نہ کرنے کی وجہ کیا ہے؟ یہ کسی کے لیے بھی اپیل کا راستہ نہیں بنے گا۔‘‘ ساتھ ہی بنچ نے اپیل کنندگان کے وکیل شیخ کو تیار رہنے کا حکم دیا اور سماعت بدھ تک کے لیے ملتوی کر دی۔ چیف جسٹس چندرشیکھر اور جسٹس گوتم اے اکھنڈ کی بنچ نے پوچھا کہ اپیل کنندگان کون تھے۔ ان کے وکیل متین شیخ نے بتایا کہ وہ ان لوگوں کے خاندان کے رکن ہیں، جن کی موت اس حادثہ میں ہو گئی تھی۔ عدالت نے ان سے پوچھا کہ کیا وہ گواہ تھے یا نہیں؟

واضح ہو کہ متاثرہ خاندانوں نے 10 ستمبر کو بامبے ہائی کورٹ میں اپیل دائر کی، جس میں تمام ملزمان کی رہائی کو چیلنج کیا گیا تھا۔ اپیل میں الزام عائد کیا گیا کہ این آئی اے نے اے ٹی ایس کے ذریعہ تلاش کیے گئے اہم ثبوتوں کو پیش نہیں کیا۔ خصوصی عدالت نے مہاراشٹر کنٹرول آف آرگنائزڈ کرائم ایکٹ (ایم سی او سی اے) کے تحت الزام ہٹا دیے، جس کے سبب مقدمہ متاثر ہوا۔ اپیل کنندگان کا کہنا ہے کہ عدالت نے معمولی غلطی اور تکنیکی نکات پر انحصار کرتے ہوئے ڈاک گھر کی طرح کام کیا، جبکہ ملزم کے ملوث ہونے کو ثابت کرنے والے مستقل ثبوت موجود تھے۔

اپیل میں یہ بھی کہا گیا کہ ملزمان کی گرفتاری کے بعد ہندوستان کے کسی بھی مسلم اکثریتی علاقہ یا عبادت گاہ کے پاس کوئی بم دھماکہ نہیں ہوا جو اے ٹی ایس کی بڑی سازش کی تھیوری کی حمایت کرتا ہے۔ ساتھ ہی این آئی اے کی لاپرواہی اور سیاسی مداخلت کا بھی الزام عائد کیا، جس کے سبب اہم دستاویزات غائب ہو گئے، جس میں ’سی آر پی سی‘ کی دفعہ 164 کے تحت درج بیان شامل ہیں۔

قابل ذکر ہے کہ 29 ستمبر 2008 کو مالیگاؤں میں ایک مسجد کے قریب ایک موٹرسائیکل پر لگے بم میں دھماکہ ہوا تھا۔ اس حادثے میں 6 لوگوں کی موت ہو گئی تھی اور 100 سے زائد لوگ زخمی ہوئے تھے۔ اے ٹی ایس کے مطابق موٹرسائیکل سادھوی کی تھی اور پروہت نے آر ڈی ایکس حاصل کیا تھا۔ حالانکہ ٹرائل کورٹ نے پایا کہ تفتیش کاروں کی جانب سے بحال کی گئی گاڑی کا چیچس نمبر صحیح نہیں تھا اور آر ڈی ایکس جمع کرنے کے متعلق استغاثہ کے دعوے کی حمایت کرنے کے لیے کوئی ثبوت نہیں تھا۔