مہاراشٹر: شیواجی مہاراج کی جینتی پر شیونیری قلعے میں ریلنگ ٹوٹی، بھگدڑ سے متعدد افراد زخمی

پونے: مہاراشٹر کے ضلع پونے میں شیواجی مہاراج کی جینتی کے موقع پر شیونیری قلعے میں اچانک پیش آئے واقعے سے بھگدڑ جیسی صورت حال پیدا ہو گئی، جس کے نتیجے میں متعدد افراد زخمی ہو گئے۔ زخمیوں میں خواتین اور بچے بھی شامل بتائے جا رہے ہیں۔ انتظامیہ کے مطابق تمام زخمیوں کو فوری طبی امداد فراہم کی گئی ہے اور کسی کی حالت نازک نہیں ہے۔

اطلاعات کے مطابق شیواجی مہاراج کی جینتی کے موقع پر جمعرات کو شیونیری قلعے میں بڑی تعداد میں عقیدت مند اور مختلف تنظیموں کے ارکان پہنچے تھے۔ بدھ کی رات سے ہی لوگوں کی آمد کا سلسلہ شروع ہو گیا تھا۔ روایت کے مطابق شیو جوت لے کر آنے والے افراد بھی بڑی تعداد میں موجود تھے، جس کے باعث قلعے کے اندرونی حصوں میں غیر معمولی بھیڑ جمع ہو گئی۔

عینی شاہدین کے مطابق شدید دباؤ کے باعث قلعے کے اندر نصب ایک ریلنگ اچانک ٹوٹ گئی، جس سے وہاں موجود لوگوں میں گھبراہٹ پھیل گئی۔ باہر نکلنے کی کوشش میں دھکم پیل شروع ہو گئی۔ امبرخانہ کے نیچے واقع ہاتھی دروازہ علاقہ اور گنیش دروازہ جیسے تنگ راستوں پر بھی لوگوں کا ہجوم اس قدر بڑھ گیا کہ آمد و رفت تقریباً رک سی گئی۔ اسی دوران کچھ افراد توازن برقرار نہ رکھ سکے اور گر پڑے، جس سے کئی لوگ معمولی طور پر زخمی ہو گئے۔

ضلع کے سپرنٹنڈنٹ آف پولیس سندیپ گل نے واقعے کی تصدیق کرتے ہوئے کہا کہ تین سے چار افراد کو معمولی چوٹیں آئی ہیں اور کسی کے شدید زخمی ہونے کی اطلاع نہیں ہے۔ انہوں نے کہا کہ فوری طور پر پولیس اور دیگر عملہ حرکت میں آیا اور حالات کو قابو میں کر لیا گیا۔

موقع پر تعینات پولیس اہلکاروں نے لوگوں کو محفوظ مقامات تک پہنچایا اور زخمیوں کو قریبی اسپتال میں داخل کرایا۔ انتظامیہ نے عوام سے اپیل کی ہے کہ وہ افواہوں پر توجہ نہ دیں اور نظم و ضبط برقرار رکھنے میں تعاون کریں۔