مدھیہ پردیش: رقص کرتی ہوئی لڑکی گری اور اُٹھ نہ سکی، اچانک موت کا ایک اور معاملہ

ملک میں ان دنوں اچانک موت ہو جانے کے معاملوں میں کافی تیزی سے اضافہ ہوا ہے۔ گزشتہ کچھ برسوں کے دوران کئی ایسے معاملے سامنے آئے ہیں جب کوئی شخص ورزش کرتے ہوئے، یا دوڑتے ہوئے، یا رقص کرتے ہوئے اچانک گر پڑا اور اس کی موت ہو گئی۔ اس طرح کی اموات میں صرف عام آدمی ہی نہیں بلکہ کچھ مشہور شخصیات کے نام بھی شامل ہیں۔ اب مدھیہ پردیش کے ودیشا میں بھی کچھ اسی طرح کا معاملہ پیش آیا ہے۔

یہاں ایک شادی کی تقریب میں موسیقی پر رقص کر رہی ایک 24 سال کی لڑکی کی اچانک گرنے کے بعد موت ہو گئی۔ اس واقعہ نے وہاں موجود سبھی لوگوں کو حیرت زدہ کر دیا۔ ابتدائی جانچ میں موت کی وجہ سائلنٹ اٹیک کو بتایا جا رہا ہے۔ اس پورے واقعہ کا ویڈیو اس وقت سوشل میڈیا پر خوب وائرل ہو رہا ہے اور لوگ اسے دیکھ کر کافی غمزدہ ہیں۔

'آج تک' کی خبر کے مطابق ودیشا کے مادھو گنج میں رہنے والے راج کمار جین کے بیٹے اور ان کے بھائی کے بیٹے کی شادی کی تقریب ایک ساتھ مگدھم ریسورٹ میں ہو رہی تھی۔ لیڈیز سنگیت کے دوران کنبہ کے رکن اسٹیج پر پرفارم کر رہے تھے۔ اسی دوران دولہوں کے اندور کے رہنے والے ماما سریندر کمار جین کی بیٹی پرینیتا جین بھی اسٹیج پر رقص کرنے کے لیے آئیں۔ بالی ووڈ فلموں کے الگ الگ گانوں پر قریب ڈیڑھ منٹ تک پرینیتا نے رقص کیا لیکن اسی درمیان وہ اچانک منھ کے زور اسٹیج پر دھڑام سے گر پڑی۔

ناچتے ناچتے اچانک پرینیتا گر کر بیہوش ہو گئی۔ پہلے تو لوگوں کو کچھ سمجھ نہیں آیا۔ پھر جب کچھ دیر تک اس کے جسم میں کوئی ہلچل نہیں ہوئی تو فوراً وہاں موجود لوگ اسے لے کر اسپتال بھاگے۔ ڈاکٹروں نے چیک اَپ کے بعد لڑکی کو مردہ قرار دے دیا۔

ماما کی بیٹی کی موت کے بعد دونوں دولہوں کے کنبہ میں خوشی کا ماحول ایک دم ماتم میں تبدیل ہو گیا۔ اہل خانہ نے لڑکی کی آخری رسوم بیتوا ندی کے پاس شمشان گھاٹ میں کی اور نم آنکھوں سے جیسے تیسے شادی کی دیگر رسمیں ادا کیں۔