ہم الیکشن ہارے ہیں لیکن ہمت و حوصلہ نہیں: کانگریس

کانگریس نے کہا ہے کہ کیرالہ اور آسام اسمبلی انتخابات کے نتائج اس کے توقع کے برخلاف ہیں ۔ان ریاستوں کو پارٹی نے جن وجوہات کی وجہ سے کھویا ہے اس پر سنجیدگی سے غور کیا جائے گا۔

کانگریس میڈیا محکمہ کے سربراہ رندیپ سنگھ سرجے والا نے کل ایک ورچول پریس کانفرنس میں کہا کہ "ان انتخابات میں آسام اور کیرالہ اسمبلی کے انتخابی نتائج ہمارے لئے چیلنج بھی ہے اور امید کے برخلاف ہے۔ ہم الیکشن ہار گئے لیکن نہ ہمت ہار ے ، نہ حوصلہ کھوئے اور نہ ہی آگے برھنے کا عزم۔ کانگریس پارٹی پلیٹ فارم پر انتخابی نتائج کا جائزہ لے گی اور جہاں جہاں خامیاں ہیں ہم مستقبل میں ان میں بہتری لاتے ہوئے مزید سنجیدگی سے کام کریں گے۔‘‘

انہوں نے کہا کہ ان دونوں ریاستوں میں کانگریس کے کارکنان اور لیڈروں نے مل کر سخت محنت کی، لیکن رائے عامہ اب بھی ہمارے حق میں نہیں ہے۔ ہمارا تعلق پورے ملک کے عوام کے ساتھ اور خاص طور پر ان ریاستوں میں جہاں انتخابات ہوئے ہیں ہمارا رشتہ صرف سیاسی نہیں بلکہ روحانی بھی ہے۔ پارٹی اس رشتے میں مزید اعتماد اور وابستگی پیدا کرنے کے لئے سخت محنت کرے گی۔