لوک سبھا انتخاب: چاندنی چوک سے کانگریس امیدوار جے پی اگروال کو شالیمار باغ اور پیتم پورہ کی عوام نے دلایا جیت کا بھروسہ

نئی دہلی: چاندنی چوک لوک سبھا پارلیمانی حلقہ سے کانگریس و عام آدمی پارٹی (عآپ) کے مشترکہ امیدوار اور سینئر لیڈر جئے پرکاش اگروال کا کہنا ہے کہ انتخاب جیتنے کے بعد وہ آر ڈبلیو اے کو ساتھ لے کر ایم پی فنڈ سے علاقہ میں ترقیاتی کام کو یقینی بنائیں گے۔ انھوں نے کہا کہ چاندنی چوک لوک سبھا کی ترقی اور عوام کی خدمت ہی میری ترجیح ہوگی۔

دراصل جئے پرکاش اگروال جمعہ کے روز شالیمار باغ اور پیتم پورہ علاقہ کی عوام سے ملاقات کرنے پہنچے ہوئے تھے۔ انھوں نے مقامی لوگوں سے رابطہ کر ان کے مسائل، علاقے کی ترقی اور مختلف منصوبوں پر تبادلہ خیال کیا۔ اس موقع پر شالیمار باغ اور پیتم پورہ علاقہ کے لوگوں نے جئے پرکاش اگروال کو آئندہ 25 مئی کو ہونے والے انتخاب میں یقینی جیت کا بھروسہ بھی دلایا۔

عوام سے ملاقات کے دوران جے پی اگروال نے کہا کہ انتخاب جیتنے کے بعد وہ شالیمار باغ اور پیتم پورہ علاقہ کے ترقیاتی کاموں میں آر ڈبلیو اے کی شراکت داری کو یقینی بنائیں گے۔ انھوں نے مزید کہا کہ شالیمار باغ اور پیتم پورہ علاقہ میں پارکنگ کا مسئلہ بہت سنگین ہے، اس لیے انتخاب جیتنے کے بعد وہ اس مسئلہ کا حل نکالیں گے۔ جئے پرکاش اگروال نے عوام کو چاندنی چوک لوک سبھا حلقہ کے ترقیاتی کاموں سے متعلق اپنے مستقبل کے منصوبوں سے روشناس بھی کرایا۔