لیہ تشدد: سابق فوجی کے بیٹے کی ہلاکت، راہل گاندھی کا وزیر اعظم پر حملہ، تشدد و خوف کی سیاست ختم کرنے کا مطالبہ

لداخ کے لیہ میں 24 ستمبر کو پیش آئے تشدد کے واقعے پر لوک سبھا میں قائد حزب اختلاف اور کانگریس لیڈر راہل گاندھی نے مرکزی حکومت کو شدید تنقید کا نشانہ بنایا ہے۔ انہوں نے کہا کہ وزیر اعظم نریندر مودی نے لداخ کے عوام کے ساتھ دھوکہ کیا ہے اور بی جے پی حکومت نے ملک کے ایک بہادر بیٹے کی جان لے لی۔

تشدد کے دوران مارے گئے تساوانگ تھارچن کرگل جنگ میں شامل ایک سابق فوجی کے بیٹے تھے۔ اس واقعے نے لداخ سمیت پورے ملک میں غم و غصے کی لہر دوڑا دی ہے۔ راہل گاندھی نے ’ایکس‘ پر تھارچن کے والد کا ایک ویڈیو شیئر کیا اور لکھا، ’’پیتا فوجی، بیٹا بھی فوجی، جن کے خون میں ہے ملک کی خدمت۔ پھر بھی بی جے پی حکومت نے اس بہادر بیٹے کو گولی مار کر جان لے لی، صرف اس لیے کہ وہ لداخ اور اپنے حق کے لیے کھڑا تھا۔‘‘

راہل گاندھی نے مزید کہا کہ تھارچن کے والد کی آنکھوں میں درد اور سوال چھپا ہے، کیا آج ملک کی خدمت کا یہی صلہ ہے؟ انہوں نے حکومت سے مطالبہ کیا کہ اس واقعے کی غیر جانب دار عدالتی جانچ کرائی جائے اور قصورواروں کو سخت ترین سزا دی جائے۔ انہوں نے کہا، ’’وزیر اعظم مودی کو تشدد اور خوف کی سیاست بند کر کے لداخ کے عوام کے ساتھ سنجیدہ مکالمہ کرنا چاہیے۔ لداخ کے لوگ اپنا حق مانگ رہے ہیں، آپ نے انہیں دھوکہ دیا ہے۔‘‘

یاد رہے کہ 24 ستمبر کو لیہ ایپکس باڈی (ایل اے بی) کی اپیل پر شہر میں بند کا اعلان کیا گیا تھا۔ یہ تنظیم لداخ کے لیے ریاستی درجہ اور چھٹی شیڈول کے دائرہ کار کو بڑھانے کی مانگ کر رہی ہے۔ بند کے دوران سیکورٹی فورسز اور مظاہرین کے درمیان شدید جھڑپیں ہوئیں جن میں چار افراد کی جان چلی گئی۔ ان میں تساوانگ تھارچن بھی شامل تھے جو ایک فوجی خاندان سے تعلق رکھتے تھے۔

پولیس اور مقامی انتظامیہ کے مطابق اس دن حالات بگڑنے کے بعد شہر میں کرفیو نافذ کر دیا گیا تھا اور اضافی فورس تعینات کی گئی۔ تاہم اس کے باوجود علاقے میں کشیدگی برقرار ہے اور مقامی لوگ مسلسل احتجاجی مظاہرے کر رہے ہیں۔

کانگریس نے بی جے پی حکومت پر الزام لگایا کہ وہ لداخ کے عوام کی جائز مانگوں کو نظر انداز کر رہی ہے اور طاقت کے زور پر آوازوں کو دبانے کی کوشش کی جا رہی ہے۔ پارٹی نے واضح کیا کہ جب تک غیر جانب دار عدالتی جانچ نہیں ہوتی، انصاف ممکن نہیں ہے۔

دوسری طرف، بی جے پی نے اپوزیشن کے الزامات کو مسترد کیا ہے اور کہا ہے کہ حکومت نے حالات کو قابو میں رکھنے کے لیے ضروری اقدامات کیے۔ بی جے پی کے ترجمانوں کا کہنا ہے کہ اپوزیشن بلا وجہ تشدد کو سیاسی رنگ دے رہی ہے۔