جے این یو: حکومت کا نظام سڑ چکا ہے جو بچوں کے خلاف تشدد کرنے کی اجازت دے رہا ہے… پرینکا گاندھی

کانگریس جنرل سکریٹری پرینکا گاندھی نے کہا ہے کہ اس حکومت کا مکمل نظام سڑ چکا ہے جو اپنے ہی بچوں کے خلاف تشدد کرنے کی اجازت دے رہا ہے، انہوں نے کہا کہ ایمس میں داخل جے این یو طلبہ کی حالت بے حد خراب ہے۔

جے این یو میں طلبہ پر حملے کی مخالفت میں دہلی کے آئی ٹی او واقع پولیس ہیڈکوارٹر پرطلبہ کا مظاہرہ شروع ہو گیا ہے، بھاری تعداد میں طلبہ آئی ٹی او پر موجود ہیں، ادھر جے این یو طلبہ پر حملہ کرنے والے ابھی بھی جے این یو کیمپس میں موجود ہیں اور پولیس باہر ہے۔

جے این یو طلبہ پر ہوئے حملے میں زخمی طلبہ کو دیکھنے کے لئے پرینکا گاندھی ایمس کے ٹرامہ سینٹر پہنچ گئیں ہیں۔

جے این یو تشدد پر کانگریس پارٹی کے ترجمان رنديپ سنگھ سرجے والا نے کہا، "مودی جی اور امت شاہ جی کی آخر ملک کے نوجوانوں اور طلبہ سے کیا دشمنی ہے؟ کبھی فیس اضافہ کے نام پر نوجوانوں کی پیٹائی، کبھی آئین پر حملے کی مخالفت ہو تو طلبہ کی پیٹائی، آج جواہر لال نہرو یونیورسٹی میں تشدد کا ننگا ناچ ہو رہا ہے وہ بھی حکومتی تحفظ میں!‘‘

دہلی کی جواہر لال نہرو یونیورسٹی میں طلبہ کے ساتھ ہوئے تشدد کو لے کر کانگریس لیڈر اور ممبر پارلیمنٹ راہل گاندھی نے کہا ہے کہ بہادر طلبہ کی آواز سے ملک کے فاشسٹ کو ڈر لگتا ہے،

راہل گاندھی نے ٹوئٹ کرتے ہوئے کہا، ’’نقاب پوش ٹھگوں کے ذریعہ جے این یو کے طلبہ اور اساتذہ پر کیا گیا سفاکانہ حملہ، جس میں کئی شدید زخمی ہو گئے، چونکانے والا ہے‘‘۔

دہلی کے آئی ٹی او پر واقع پولیس ہیڈکوارٹر کے باہر ہزاروں طالب علموں کا جے این یو یونیورسٹی کیمپس اور ہاسٹل میں طلبہ اور اساتذہ کے ساتھ ہوئی مارپیٹ کے خلاف مظاہرہ کر رہے ہیں، جے این یو کے طلبہ پر ہوئے حملے میں تقریباً 20 طالب علم زخمی ہوئے ہیں جنہیں ایمس میں داخل کرایا گیا ہے۔

جامعہ کوآرڈینیشن کمیٹی کی کال پر سینکڑوں کی تعداد میں طلبا اور دیگر لوگ دہلی کے آئی ٹی او پر واقعہ پولیس کے صدر دفتر پر پہنچ کر احتجاج کر رہے ہیں۔

جواہر لال نہرو یونیورسٹی (جے این یو) میں گھس کر نقاب پوش غنڈوں کی طرف سے طلبا اور اساتذہ کے ساتھ کی گئی مار پیٹ کے بعد رات 9 بجے آئی ٹی او پولیس ہیڈ کوارٹر کے محاصرہ کی کال دے دی گئی ہے۔ آئی ٹی او پر احتجاج کی کال جامعہ کوآرڈینیشن کمیٹی کی جانب سے دی گئی ہے۔

دہلی کی مشہور جواہر لال نہرو یونیورسٹی میں ایک بار پھر ہنگامہ ہوگیا۔ خبروں کے مطابق نقاب پوش غنڈوں نے کیمپس کے اندر  گھس کر توڑ پھوڑ کی۔ اور اساتذہ اور طلبہ پر بھی حملہ کیا۔ حملے میں طلباء یونین کی صدر آئشی گھوش اور جے این یو کی ایک اساتذہ سچترا پوری طرح سے زخمی  ہوگئیں۔

دہلی کی جواہر لال نہرو یونیورسٹی کے احاطے میں گھس کر لاٹھی اور ڈنڈوں سے لیس کچھ نقاب پوشوں نے طلباء اور اساتذہ کے ساتھ مرپيٹ کی، اس دوران جے این یو کی طلبا یونین کی صدر آئشی گھوش بری طرح زخمی ہو گئیں، آئشی نے بتایا کہ کچھ نقاب پوشوں نے انہیں بری طرح پیٹا۔

جالندھر 05 جنوری (یواین آئی) پاکستان میں واقع گرودوارہ ننکانہ صاحب پر حملے کی مخالفت میں جالندھر کے فتح پور گاؤں کے کچھ نوجوانوں کے ذریعہ مسلمانوں کو مسجد میں نماز پڑھنے سے روکنے پر گاؤں میں ماحول کشیدہ ہو گیا۔ پولیس نے اس سلسلے میں دو نوجوانوں کو گرفتار کیا ہے۔ مسجد-اے-كووا کے امام مظہر عالم نے اتوار کو بتایا کہ فتح پور مسجد کے قاضی محمدقیصر کی غیر موجودگی میں گاؤں کے کچھ لڑکوں نے مسلمانوں کو نماز پڑھنے سے روکا اور نازیبا الفاظ کا استعمال کیا۔انہوں بتایا کہ واقعہ کی اطلاع ملنے پر پولیس ڈپٹی کمشنر بلکار سنگھ نے دونوں فریقوں کو سمجھا کر معاملہ ٹھنڈا کیا۔ پولیس نے اس سلسلے میں گاؤں کے ہی دو لڑکوں کو حراست میں لیا ہے۔

دہلی کے جامعہ نگر، شاہین باغ میں سی اے اے، این آر سی مخالف احتجاج کے مقام کے قریب پولیس کی سرگرمیوں میں اضافہ نظرت آ رہا ہے۔ پولیس اہلکار کی ایک بڑی تعداد میں تعیناتی کی گئی ہے۔ پولیس کی سرگرمیوں کے پیش نظر بڑی تعداد میں لوگ احتجاجی مظاہرے کے مقام پر جمع ہوگئے ہیں۔

تہران: ایران کے ٹاپ فوجی کمانڈر قاسم سلیمانی کے مارے جانے پر عراقیوں کے جشن منانے کے امریکی وزیر خارجہ مائیک پومپيو کے دعویٰ سے ناراض ایران کے وزیر خارجہ جواد ظریف نے انہیں (پومپيو کو) ’گھمنڈی مسخرا‘ قراردیا ہے۔

پومپيو نے عراق کے دارالحکومت بغداد میں امریکہ کی طرف سے کئے گئے ڈرون حملہ میں سلیمانی کے مارے جانے کے بعد دعویٰ کیا تھا کہ ان کے مارے جانے پر عراق کے لوگوں نے جشن منایا۔ ان کے اس بیان سے ناراض ظریف نے انہیں ’گھمنڈی مسخرا‘ بتاتے ہوئے جمعہ کی رات ٹوئٹر پر لکھا’’ایک سفارتکار کے بھیس میں ’گھمنڈی مسخرا‘ نے 24 گھنٹے پہلے دعوی کیا تھا کہ عراق کے شہروں میں لوگ جشن منا رہے ہیں۔ ہمارے لاکھوں بھائی بہن آج ملک بھر میں سلیمانی کی مقدس روح کو خراج عقیدت پیش کر رہے ہیں۔ مغربی ایشیا میں امریکہ کی موجودگی ختم ہونے کا آغاز ہو گیا ہے‘‘۔

تہران: عراق کی راجدھانی بغداد میں جمعہ کے روز امریکی حملہ میں ہلاک ہونے والے ایرانی جنرل قاسم سلیمانی کی میت مغربی ایران کے شہر اہواز پہنچا دی گئی۔ دو روز قبل عراق کے دارالحکومت بغداد کے ایئرپورٹ پر امریکہ کی جانب سے راکٹ حملے کیے گئے تھے جس کے نتیجے میں ایرانی جنرل قاسم سلیمانی سمیت 8 افراد ہلاک ہوگئے تھے۔ راکٹ حملے میں ایرانی حمایت یافتہ ملیشیا پاپولرموبلائزیشن فورس (پی ایم ایف) کے ڈپٹی کمانڈرابومہدی المہندس بھی ہلاک ہوئے تھے۔

گزشتہ روز عراق کے دارالحکومت بغداد میں قاسم سلیمانی کی نماز جنازہ اداکی گئی تھی جس میں ہزاروں افراد نے شرکت کی تھی اس موقع پر جنازہ میں شریک لوگوں نے امریکہ مردہ باد کے نعرے بھی لگائے تھے۔ قاسم سلیمانی کو ان کے آبائی قصبہ میں سپرد خاک کیا جائے گا۔

واضح رہے کہ جنرل قاسم سلیما نی کی ہلاکت پر پنٹاگن کی جانب سے جاری بیان میں کہا گیا تھا کہ قاسم سلیمانی کوامریکی صدر ڈونلڈ ٹرمپ کی ہدایت پرمستقبل میں ایران کی جانب سے حملوں کو روکنے کے لیے ہلاک کیا گیا ہے۔