ہماچل پردیش میں شدید بارش کے بعد بھاری لینڈسلائیڈنگ، چنڈی گڑھ-منالی ہائی وے مکمل طور پر بند

ہماچل پردیش کے ضلع منڈی میں واقع پنڈوہ کے مقام پر گزشتہ رات شدید بارش کے بعد لینڈ سلائیڈنگ کے سبب چنڈی گڑھ-منالی قومی شاہراہ (این ایچ-3) مکمل طور پر بند ہو گئی ہے۔ پنڈوہ ڈیم کے قریب یہ واقعہ مسلسل بارش کے نتیجے میں پیش آیا جس کی وجہ سے سڑک پر بھاری مقدار میں ملبہ، پتھر اور مٹی آ گری، جس نے دونوں اطراف کی ٹریفک کو مکمل طور پر روک دیا۔

منڈی کی ایس پی ساکشی ورما نے تصدیق کی ہے کہ شاہراہ دونوں طرف سے بند ہے اور فی الحال کسی بھی قسم کی آمدورفت ممکن نہیں۔ ضلعی انتظامیہ اور دیگر متعلقہ محکموں کی ٹیمیں موقع پر پہنچ گئی ہیں اور ملبہ ہٹانے کا کام تیزی سے جاری ہے تاکہ جلد از جلد راستہ صاف کر کے ٹریفک بحال کی جا سکے۔

انتظامیہ نے منالی جانے والے سیاحوں اور مقامی باشندوں کو متنبہ کیا ہے کہ وہ متبادل راستوں کا استعمال کریں یا غیر ضروری سفر سے گریز کریں، جب تک کہ سڑک مکمل طور پر محفوظ نہ ہو جائے۔ موجودہ موسمی حالات کو مدِنظر رکھتے ہوئے مزید لینڈ سلائیڈنگ کے خدشے کو رد نہیں کیا جا سکتا۔

ریاست میں مانسون کے دوران ایسے واقعات میں نمایاں اضافہ دیکھا گیا ہے۔ حالیہ ہفتوں میں کئی اضلاع سے لینڈ سلائیڈنگ اور سڑکوں کے بیٹھ جانے کی خبریں سامنے آئی ہیں، جس نے نہ صرف عوامی آمدورفت کو متاثر کیا بلکہ سیاحت کے شعبے کو بھی نقصان پہنچایا ہے۔

محکمہ موسمیات نے آئندہ 48 گھنٹوں میں ہماچل کے کئی حصوں میں شدید بارش کی پیش گوئی کی ہے، جس کے پیش نظر انتظامیہ اور ریاستی ڈیزاسٹر مینجمنٹ ٹیموں کو ہائی الرٹ پر رکھا گیا ہے۔

حکام عوام سے اپیل کر رہے ہیں کہ وہ سرکاری ہدایات پر عمل کریں، موسم کی صورت حال پر نظر رکھیں، اور صرف انتہائی ضرورت کے تحت ہی پہاڑی علاقوں کا رخ کریں۔ حفاظتی اقدامات اور فوری ردِعمل کے ذریعے کسی بھی بڑے حادثے سے بچنے کی کوشش کی جا رہی ہے۔