’بی جے پی حکومت اور پی ایم مودی میں دور اندیشی کی کمی‘، بڑھتی مہنگائی پر کھڑگے کا تلخ تبصرہ

کانگریس صدر ملکارجن کھڑگے نے پٹرول، ڈیزل اور دیگر ضروری اشیاء کی بڑھتی قیمتوں کو لے کر مرکز کی مودی حکومت پر شدید حملہ کیا ہے۔ انہوں نے الزام عائد کیا ہے کہ اگر وزیر اعظم نریندر مودی انتخاب سے پہلے پٹرول-ڈیزل سمیت دیگر اشیاء کی قیمتوں میں اضافہ کر دیتے تو بی جے پی کو زبردست سیاسی نقصان اٹھانا پڑتا، اسی لیے حکومت نے قصداً عوام سے حقیقت چھپائے رکھی۔

کیرالہ کے ترووننت پورم میں میڈیا نمائندوں سے گفتگو کرتے ہوئے کھڑگے نے کہا کہ انتخابات مکمل ہوتے ہی اشیائے ضروریہ کی قیمتوں میں اضافہ کر دیا گیا، جس سے واضح ہوتا ہے کہ حکومت نے سیاسی فائدے کے لیے مہنگائی کے مسئلے کو دبائے رکھا تھا۔ انہوں نے کہا کہ ’’مودی حکومت نے انتخابات تک تمام باتیں ملک سے چھپا کر رکھیں، لیکن جیسے ہی الیکشن ختم ہوئے، قیمتیں بڑھنا شروع ہو گئیں۔‘‘

کانگریس صدر نے بی جے پی حکومت کو دور اندیشی سے محروم قرار دیتے ہوئے کہا کہ حکومت کے پاس نہ تو مہنگائی پر قابو پانے کا کوئی مؤثر منصوبہ ہے اور نہ ہی غریب عوام کو راحت پہنچانے کی سنجیدہ کوشش۔ ان کے مطابق مسلسل بڑھتی مہنگائی نے عام آدمی کی زندگی دشوار بنا دی ہے۔ انھوں نے یہ بھی کہا کہ کانگریس اس مسئلے کو بھرپور طریقے سے اٹھائے گی، کیونکہ بی جے پی حکومت کی پالیسیوں کی وجہ سے مہنگائی مسلسل بڑھ رہی ہے۔ انہوں نے دعویٰ کیا کہ ملک کے غریب طبقات آج ان بنیادی ضروریات سے بھی محروم ہوتے جا رہے ہیں، جن پر ان کا حق ہے۔

ملکارجن کھڑگے کا کہنا ہے کہ پٹرول اور ڈیزل کی قیمتوں میں اضافہ صرف ایندھن تک محدود نہیں رہتا بلکہ اس کا اثر ٹرانسپورٹ، خوردنی اشیاء اور روزمرہ استعمال کی تمام چیزوں پر پڑتا ہے، جس سے عام لوگوں کی مشکلات میں مزید اضافہ ہوتا ہے۔ کھڑگے نے میڈیا اہلکاروں سے ہوئی گفتگو کی ویڈیو سوشل میڈیا پلیٹ فارم ’ایکس‘ پر شیئر بھی کی ہے۔ وہ کیرلم کے وزیر اعلیٰ وی ڈی وستیسن کی حلف برداری تقریب میں شرکت کرنے تروونت پورم پہنچے تھے، جہاں بڑھتی مہنگائی پر پوچھے گئے ایک سوال کے جواب میں کھڑگے نے مودی حکومت کو ہدف تنقید بنایا۔