دو لاکھ اسکولوں میں کچن گارڈن لگائے گئے

نئی دہلی: مڈ ڈے میل پروگرام کے تحت پورے ملک میں دو لاکھ سے زائد اسکولوں میں کچن گارڈن لگائے گئے ہیں جن میں دوپہر کے کھانے کے لیے پھل اور سبزی اگائی جا رہی ہیں۔ فروغ انسانی وسائل کے مرکزی وزیر رمیش پوکھریال نیشنک نے آج راجیہ سبھا میں ضمنی سوال کے جواب میں یہ دعویٰ کیا۔ انہوں نے کہا کہ مڈ دے میل پروگرام کے تحت تمام ریاستوں اور مرکز کے زیر انتظام ریاستوں میں اسکولوں میں کچن گارڈن لگانے کے لیے ترغیب دی جا رہی ہے۔ ان میں پیدا کی جانے والی سبزیوں اور پھلوں کا استعمال دوپہر کے کھانے میں کیا جا سکتا ہے۔

انہوں نے کہا کہ اس منصوبے کے تحت 11 لاکھ اسکولوں میں کچن گارڈن لگائے جانے ہیں جن میں سے دو لاکھ اسکولوں میں یہ گارڈن لگائے جا چکے ہیں۔ ان کا مقصد بچوں کو فطرت اور باغبانی کے تجربے سے روشناس کروانا بھی ہے۔ ان گارڈنوں کو اسکول احاطے میں کہیں بھی لگایا جا سکتا ہے۔

دسویں اور بارہویں کے طلبہ کے لیے سنٹرل بورڈ آف سیکنڈری ایجوکیشن (سی بی ایس ای) کی جانب سے امتحان کے فیس میں اضافے کو واپس لینے سے متعلق سوال پر پوکھریال نے کہا کہ بورڈ ایک خود مختار ادارہ ہے اور وہ پورے ملک میں امتحانات کا انعقاد کرتا ہے جس کے لیے اسے انتظام و انصرام کرنا ہوتا ہے۔ یہ فیس تمام طلبہ کے لیے یکساں ہے۔

جموں و کشمیر میں نیشنل لاء یونیورسٹی کے قیام سے متعلق سوال پر انہوں نے کہا کہ جموں و کشمیر نیشنل لاء یونیورسٹی ایکٹ سے قبل ہی نوٹیفائی کیا جا چکا ہے اور بنیادی ضرورتوں کے پورا ہوتے ہی وہاں اس یونیورسٹی کا افتتاح ہو جائے گا۔