آٹھ سال کی عمر میں اغوا ہونے والی خاتون 49 سال بعد اہل خانہ سے ملی

اعظم گڑھ: اتر پردیش کے ضلع اعظم گڑھ میں 49 سال پہلے اغوا ہونے والی ایک خاتون اپنے اہلخانہ سے دوبارہ مل گئی۔ سال 1975 میں، 8 سالہ بچی پھول متی اپنی والدہ کے ساتھ مرادآباد گئی تھی جہاں ایک شخص نے اسے لالچ دے کر اغوا کر لیا۔ بعد میں اسے رام پور ضلع کے رہائشی لالتا پرساد کو سونپ دیا گیا، جس نے بچی سے شادی کر لی۔

شادی کے بعد ان کا ایک بیٹا پیدا ہوا، جو اب 34 سال کا ہے۔ اغوا کے بعد، خاتون نے اپنی دھندلی یادوں کے ذریعے اپنے گاؤں اور خاندان کو تلاش کرنے کی کوشش جاری رکھی۔ وہ اپنے گاؤں کا نام اور کچھ تفصیلات یاد رکھتی تھیں، جنہوں نے پولیس کو تفتیش میں مدد فراہم کی۔

ایس پی سٹی شیلندر لال کی قیادت میں پولیس ٹیم متاثرہ خاتون کو رام پور سے تلاش کر کے اعظم گڑھ لائی اور ان کی فراہم کردہ معلومات کی بنیاد پر ان کے گاؤں اور ماموں کے گھر کی شناخت کی۔ متاثرہ نے اپنے ماموں، رام چندر اور اپنے پرانے گھر کے متعلق تفصیلات فراہم کیں، جن سے پولیس نے تصدیق کی کہ یہ وہی خاتون ہیں جو 49 سال قبل لاپتہ ہوئی تھیں۔

ماموں اور دیگر اہلخانہ سے ملاقات کے دوران پھول متی کی خوشی کا کوئی ٹھکانہ نہ رہا۔ انہوں نے کہا، ’’بچپن کی یادوں کے ساتھ زندگی گزار رہی تھی، آج مجھے میرا خاندان واپس ملا۔‘‘ ان کے ماموں اور دیگر رشتہ داروں نے بھی بے حد خوشی اور جذبات کا اظہار کیا۔

خاتون کا 34 سالہ بیٹا، اپنی ماں کے ساتھ پیش آئے اس حادثے کو جان کر حیران اور جذباتی نظر آیا۔ تمام اہلخانہ نے پولیس کے اس بے مثال کام کی تعریف کی۔