کشمیر: اننت ناگ میں سیکورٹی فورسز اور ملی ٹنٹوں کے درمیان تصادم، محاصرہ میں دو سے تین ملی ٹنٹ پھنسے

سری نگر: جنوبی کشمیر کے ضلع اننت ناگ کے شری گفوارہ علاقے کے جنگلات میں بدھ کی صبح سیکورٹی فورسز اور ملی ٹنٹؤں کے درمیان تصادم چھڑ گیا۔ سرکاری ذرائع نے بتایا کہ ملی ٹنٹوں کے چھپنے کی اطلاع موصول ہونے پر فوج کی 3 آر آر، سی آر پی ایف اور پولیس کی ایک مشترکہ ٹیم نے بدھ کی صبح ضلع اننت ناگ کے سری گفوارہ علاقے کے شال گل جنگلات کو محاصرے میں لے کر تلاشی آپریشن شروع کیا۔

انہوں نے بتایا کہ جوں ہی تلاشی آپریشن کی ایک ٹیم مشتبہ جگہ کے نزدیک پہنچی تو وہاں چھپے ملی ٹنٹوں نے ان پر اندھا دھند فائرنگ شروع کر دی جس کے نتیجے میں طرفین کے درمیان تصادم چھڑ گیا جو آخری اطلاعات موصول ہونے تک جاری تھا۔ ذرائع کے مطابق محاصرے میں دو سے تین ملی ٹنٹ پھنسے ہوئے ہیں۔ دریں اثنا ایک سینئر پولیس افسر نے تصادم چھڑنے کی تصدیق کرتے ہوئے کہا کہ طرفین کے درمیان تصادم جاری ہے۔