کانوڑیے اب یاترا کے دوران ہاکی، ڈنڈا اور ترشول نہیں رکھ پائیں گے ساتھ، تصادم کے بڑھتے واقعات کے سبب پابندی عائد

کانوڑ یاترا کے دوران ہو رہی مار پیٹ اور ہنگامہ کے بڑھتے واقعات کو دیکھتے ہوئے اتر پردیش پولیس نے سختی کرنے کا فیصلہ کیا ہے۔ سہارنپور رینج کے ڈی آئی جی ابھشیک سنگھ نے کانوڑ یاترا سے متعلق بنے اصولوں پر سختی سے عمل کرنے کی ہدایت افسران کو دے دی ہے۔ ڈاک کانوڑ سے متعلق بھی سخت ہدایات جاری کی گئی ہیں۔

موصولہ اطلاع کے مطابق سہارنپور، شاملی اور مظفر نگر کی طرف سے کانوڑ یاترا میں کانوڑیوں کے لاٹھی ڈنڈے، ترشول اور ہاکی اسٹک لے کر چلنے پر پوری طرح پابندی لگا دی گئی ہے۔ اس کے علاوہ بغیر سائلنسر کی بائک کے استعمال پر بھی پابندی عائد کر دی گئی ہے۔ ڈی آئی جی ابھشیک سنگھ نے رینج کے افسران کو سخت ہدایت دی ہے کہ کانوڑیوں سے اصولوں پر عمل کرایا جائے۔ انھوں نے سہارنپور، شاملی اور مظفر نگر کے افسران کے ساتھ ساتھ کانوڑ یاترا یونین سے جڑے لوگوں سے ویڈیو کانفرنس کے ذریعہ میٹنگ کی۔ اس میں انھوں نے سبھی سے ڈاک کانوڑ اور پیدل چلنے والے کانوڑیوں کے لیے جو اصول بنائے ہیں، ان سبھی اصولوں پر عمل کروانے کے لیے کہا ہے۔

ابھشیک سنگھ نے کہا کہ کوئی بھی کانوڑیا اپنی یاترا کے دوران ہاکی اسٹک، ترشول، لاٹھی و ڈنڈے لے کر نہ چلے۔ اس کے علاوہ کچھ ڈاک کانوڑیے بغیر سائلنسر کی بائک سے سفر کرتے ہیں، جس کی وجہ سے حادثات ہو جاتی ہیں۔ اس طرح کی بائک کا استعمال بالکل بھی نہ کریں، ورنہ اس طرح کی بائک کو ضبط بھی کیا جا سکتا ہے۔ بڑی گاڑیوں کے ذریعہ کانوڑ لانے والے لوگ اس کا سائز اور ڈی جے کی لمبائی و چوڑائی کا خیال رکھیں۔