’کئی معاملوں میں جنتا دل یو اور آر جے ڈی کے نظریات یکساں‘، جنتا دل یو لیڈر کے بیان سے ہلچل

بہار میں کئی ایشوز پر جنتا دل یو اور آر جے ڈی کا نظریہ ایک جیسا معلوم پڑتا ہے۔ حال ہی میں مرکزی حکومت کے ذریعہ لانچ اگنی پتھ اسکیم کو ہی لے لیجیے، اس تعلق سے نہ ہی جنتا دل یو نے کوئی حمایتی بیان دیا ہے، اور نہ ہی آر جے ڈی اس کے حق میں کھڑی نظر آ رہی ہے۔ اسی طرح ذات پر مبنی مردم شماری معاملے میں بھی دونوں پارٹیاں شروع سے ہی یکساں نظریہ رکھتی ہیں۔ اس درمیان جنتا دل یو کے پارلیمانی بورڈ سربراہ اوپیندر کشواہا نے ایک بیان دے کر بہار کی سیاست میں ایک بار پھر ہلچل پیدا کر دی ہے۔ انھوں نے کہا ہے کہ ’’آر جے ڈی اور جنتا دل یو کے نظریات ملتے ہیں۔‘‘

دراصل اوپیندر کشواہا نے ہفتہ کے روز ایک میڈیا چینل سے بات کر رہے تھے۔ اس دوران جب ان سے یہ سوال کیا گیا کہ جس طریقے سے اگنی پتھ اور ذات پر مبنی مردم شماری کو لے کر جنتا دل یو کی ان دنوں آر جے ڈی سے نزدیکیاں ہیں، کہیں ایسا تو نہیں کہ پھر سے لالو اور نتیش ایک ساتھ ہوں گے؟ اس پر اوپیندر کشواہا نے کہا کہ ایسا نہیں ہے۔ کئی معاملوں میں جنتا دل یو اور آر جے ڈی کے نظریات ملتے ہیں، لیکن جنتا دل یو عملی اور اصولی دونوں ایک طرح کا رخ رکھتے ہیں۔ ان کے (آر جے ڈی) یہاں اصولی باتیں تو ہوتی ہیں، لیکن جو عمل وہ کرتے ہیں وہ بہار کے اور ملک کے لوگوں سے پوشیدہ نہیں ہے۔ اس لیے کئی بار یہ دکھائی ضرور دیتا ہے کہ ایک ایشو پر دونوں کا اتفاق بنتا ہے، لیکن اس کی وجہ سے کوئی سیاسی بدلاؤ کی گنجائش نہیں ہے۔

واضح رہے کہ حال ہی میں اے آئی ایم آئی ایم کے چار اراکین اسمبلی آر جے ڈی میں شامل ہو گئے ہیں۔ اس کے بعد آر جے ڈی 80 اراکین اسمبلی کے ساتھ ریاست کی نمبر وَن پارٹی بن گئی ہے۔ اس سلسلے میں اوپیندر کشواہا نے کہا کہ جوڑ توڑ کر تعداد بڑھا لینے کا کوئی مطلب نہیں ہے۔ دیکھنے والی بات یہ ہے کہ جس وقت انتخاب ہوا اور جو اکثریت این ڈی اے کے پاس اس وقت تھی، آج بھی ہے۔